Bolangizning sizni tashvishga solishi mumkin boʻlgan xatti-harakatlari: begonalardan qoʻrqish
Notanish odam qoʻliga olganida yoki murojaat qilganida kichkintoyingiz bezovtalanishi mumkin. Bolada bunday bezovtalik tez-tez uchraydi va 7–10 oylikda yaqqol namoyon boʻladi. Bu holat bir necha oy yoki yil davom etishi mumkin va odatda bola 18–24 oylik boʻlganida oʻtib ketadi.
Body
Nima qilishingiz mumkin?
Rivojlanish vaqtida begonalardan qoʻrqish holati kuzatiladi, siz bolangizning noqulayligini yengillashtirishga yordam bera olasiz.
- Bolaning bezovtalanishini eʼtiborsiz qoldirmang va rad qilmang. Chaqaloq nima qilayotganini sizga aniqroq koʻrsatish uchun yigʻlab yuborishi va undan ham jiddiyroq munosabat bildirishi mumkin.
- Yangi odamlar bilan tanishganda chaqaloqni qoʻlingizda yoki tizzangizda ushlang. Iloji boʻlsa, yangi odamlarni tanish muhitda, masalan, uyingizda tanishtiring.
- Agar chaqaloq yangi odamga koʻnika olmasa, unga tasalli bering va tinchlantiring. Shundan keyingina birgalikda oʻynashga harakat qiling. Oʻyinni boshlash uchun chaqaloqni yangi odamdan uzoqlashtiring.
- Sabrli va muloyim boʻling. Chaqaloqdan yangi odam bilan munosabat oʻrnatishni talab qilmang. Kattalar oʻzlarini qanday his qilayotganidan koʻp tashvishlanmang – begonalardan bolani qoʻllariga olishdan oldin kutib turishini soʻrang. Chunki chaqaloq yangi odamlar bilan uchrashib, ular bilan muloqot qilishi uchun vaqt zarur.
- Chaqaloqni yangi odamlarga tanishtirganda oʻzingizni xotirjam tuting. Chaqaloq sizning xatti-harakatingizni kuzatadi va sizning munosabatingizga qarab vaziyatni baholaydi.
- Yangi odamlar bilan uchrashishni rad etmang, aksincha, yangi odamlar bilan tanishish uchun chaqalogʻingizga sharoit yaratib bering. Har doim mehmonlarni samimiy kutib oling. Tabassum, yoqimli va quvnoq ovoz, vizual aloqa orqali chaqaloqqa yangi odamlar bilan aloqada boʻlish yoqimli ekanini tushuntiring.
Begonalardan haddan tashqari qoʻrqish bola katta boʻlganida ijtimoiy munosabatlarga kirisha olmasligiga sabab boʻlishi mumkin. Shuning uchun bolani chaqaloqlik davridanoq yangi muhitga oʻrgatib borish zarur. Bu jarayonda bolada kuchli bezovtalik yoki asabiylik doimiy kuzatilsa, albatta mutaxassislarga murojaat qiling. Agar begonalardan qoʻrqish bola hayotining ikkinchi yilidan keyin ham davom etsa, mutaxassislardan maslahat oling.
