Ijobiy eʼtibor

Bolaga ijobiy eʼtibor berish:

• Chaqaloq sizga qaraganida unga jilmaying. U sizning tabassumingizdan bahramand boʻladi, bundan tashqari, sizni tabassum qildira olishini bilsa, oʻzining siz uchun muhim ekanini anglaydi. Tabassumingiz “mukofot”ning bir turi boʻlib, chaqaloq uni chaqirganingizda yuzlanib, sizni jilmaytira olish mahoratidan zavqlanadi. Bu, oʻz navbatida, siz bilan aloqani saqlab qolish, eʼtiboringizni tortish va oʻzaro munosabatlar orqali oʻrganish mahoratini kuchaytiradi. Kichkintoyning koʻzlariga qiziqish va muloyimlikni (katta ochilgan koʻzlar, tabassum va iliq ovoz) koʻrsatadigan yuz ifodasi bilan qaraganingizda unda sizga nisbatan ishonch hissi uygʻonadi.
• Bolani bagʻringizga oling, mehr bilan silang va mehringizni jismonan boshqa yoʻllar bilan ifoda eting. Kichkintoy uchun, ayniqsa, hayotning dastlabki kunlarida teginish xavfsizlik haqida oʻrganishning bitmas-tuganmas manbai va odamlar bilan bogʻlanish uchun aloqa vositasidir, u orqali bola tinchlanadi va oʻzi hamda dunyo haqida bilib oladi. Bolani quchoqlash, muloyimlik va mehr bilan teginish unga sevimli ekani, xavfsizligi, himoyalangani toʻgʻrisida xabar beradi.
• Chaqaloq haqida iliq soʻzlarni ayting, u soʻzlarning maʼnosini tushunguncha ovozingizning ohangini va qanday gapirayotganingizni bilib oladi. Bolaning ijobiy sifatlarini tavsiflovchi, tabassum bilan aytilgan soʻzlar bolada oʻziga ishonch va boshqa xislatlarni rivojlantiradi.
• Bolaning qiziqishi (masalan, chaqaloq nimaga qaraydi, ishora qiladi, yetishga harakat qiladi), faoliyati va yutuqlariga qiziqish bildiring. Buni harakatni nomlash orqali amalga oshirishingiz (“Xoʻsh, sen qushga qarayapsan!), keyin bir muddat chaqaloq bilan birga ushbu faoliyatda ishtirok etishingiz mumkin. “Kutish” koʻnikmasini rivojlantirishga harakat qiling – chaqaloqqa soʻzlaringizga javob berish, jilmayish, qoʻngʻiroq qilish uchun vaqt bering. U sizga qaraydi, yana ishora qiladi yoki oʻzi istagan ishni bajarishga harakat qiladi, faoliyatda qatnashgan paytda nigohingiz va soʻzlaringizni izlaydi, jilmayadi yoki tovushlar chiqaradi va harakatlanadi. Ushbu tajribani bola va uning qiziqishlari haqidagi yaxshi soʻzlar bilan toʻldiring. Bu turdagi almashinuv siz uchun qanchalik qisqa yoki ahamiyatsiz va mayda narsalar bilan bogʻliq boʻlishidan qatʼi nazar, bola uchun oʻz-oʻziga baho berish haqida oʻrganishning ajoyib manbai hisoblanadi.

Ijobiy eʼtibor chaqaloqqa birinchi kundan boshlab u muhim, mahoratli ekanini, undan atrofdagilar zavqlanishini oʻrgatadi. Bu bolada oʻzi haqida ijobiy tasavvur uygʻotadi, bu esa oʻz-oʻzini baholash, farovonlik, boshqalar bilan (keyinchalik tengdoshlar, oʻqituvchilar, yaqin kishilar bilan) yaxshi munosabatlar hamda dunyoni oʻrganish va kashf etishga tayyor boʻlish uchun poydevor hisoblanadi.