Jarohatdan qon ketishni qanday toʻxtatish kerak?

Qon ketishi turli xil jarohatlar natijasida (kesilish, yiqilish va yoʻl-transport hodisalari tufayli) yuzaga kelishi mumkin. Qon ketishni toʻxtatish usuli jarohatlanish turiga bogʻliq va ushbu usullarni bilish esa kelib chiqishi mumkin boʻlgan oqibatlarga bogʻliq holda qoʻshimcha ahamiyatga ega.

Yuzaki jarohat

  • Jarohat joyini kirdan tozalash uchun sovun va oqar suv bilan yuving.
  • Jarohatni quriting.

Ozroq qon ketishi

  • Jarohatni yuvgandan keyin unga steril dokani qoʻyish kifoya qiladi.
  • Agar sizda steril doka boʻlmasa, toza matodan foydalaning va uni leykoplastir bilan mahkamlang.

Koʻp qon ketishi

  • Qon ketishini toʻxtating. Buning uchun qon oqayotgan jarohat joyiga buklangan steril doka qoʻying va qattiq bosmasdan, qon ketgan joyni bir muddat ushlab turing.
  • Qon ketishini kamaytirish uchun qon ketayotgan tana qismini koʻtaring.
  • Steril dokani bint bilan (agar boʻlsa), uning atrofini oʻrash orqali mahkamlashingiz mumkin.
  • Agar doka va bintdan qon oqib chiqayotganini koʻrsangiz, ularni olib tashlamang; buning oʻrniga, koʻproq doka qoʻyib, qon ketish joyini qattiqroq bosing.
  • 5–10 daqiqadan soʻng, qon toʻxtaganini tekshiring.
  • Agar qon ketishi toʻxtamagan yoki jarohatning chetlari ochilgan boʻlsa, shifokorga murojaat qilish zarur.
  • Tibbiy muassasaga yetib borgunga qadar jarohatni doimo bosib turing.
  • Agar tananing bu qismi koʻkarganini yoki muzlaganini sezsangiz, bosimni yengillashtiring.

Juda koʻp qon ketishi

  • Yuqorida taʼriflanganidek, jarohatni bosing va darhol tez yordam chaqiring (103 ga qoʻngʻiroq qiling).
  • Tez yordamni kutayotganda, jarohatni doimo bosib turing va tananing shu qismini baland holatda ushlang.
  • Agar tananing bu qismi koʻkarganini yoki muzlaganini sezsangiz, bosimni yengillashtiring.
  • Bolaning ahvolini kuzatib boring, u bilan gaplashing va tasalli bering.

Nima qilmaslik kerak?

  • Hech qachon jarohatdagi yot narsalarni olib tashlamang, chunki bu qon ketishini kuchaytirishi mumkin!
  • Jarohatga hech narsa qoʻymang!
  • Koʻp qon ketayotgan jarohatni juda koʻp yuvmaslik kerak!