Kichkintoylarda tish chiqishi

Sut tishlarining oʻsishi

• Tishlar chaqaloq hali bachadonda boʻlgan paytdayoq milklarda shakllanadi.
• Aksariyat bolalarda birinchi tish 6 oylikdan 10 oylikkacha boʻlgan davrda yorib chiqadi, lekin u ertaroq, hatto tugʻilgan paytda yoki keyinroq, hayotning birinchi yilidan soʻng ham paydo boʻlishi mumkin.
• Tishlar maʼlum bir tartibda chiqadi, bu tartib doim ham bir xil boʻlavermaydi.
• Odatda dastlab pastki oʻrta kuraktishlar, keyin yuqori oʻrta va yon kuraktishlar yorib chiqadi. Birinchi yil oxirigacha bolaning 6 ta tishi boʻladi.
• Uchinchi yil oxirigacha koʻpchilik bolalarda 20 ta sut tishi boʻladi.

Tish chiqishi

• Tishlar milklarni yorib chiqa boshlaganda bolalar koʻp injiqlik qiladi. Bu davrda bolalarga milklarini massaj qilish uchun nimanidir tishlash va chaynash yoqadi, tish chiqayotgan joy biroz qizarishi va shishishi mumkin.
• Tish chiqishi davrida baʼzi bolalarning feʼl-atvori oʻzgarmaydi, lekin aksariyat bolalarda ota-onalar muayyan feʼl-atvor oʻzgarishlarini sezadi: ular koʻproq yigʻlaydi, injiqlik qiladi, koʻp soʻlak ajratadi, odatdagidek ovqatlanmaydi, uxlashga qiynaladi va kechasi tez-tez uygʻonadi. Ular qoʻliga tushgan hamma narsani (oʻyinchoqlar, sochiqlar) chaynaydi; rezinka soʻrgʻich soʻraydi, tagligini tez-tez yomon qiladi; tish chiqayotgan tomondagi qulogʻini ishqalaydi.
• Ushbu oʻzgarishlar – bolaning rivojlanish bosqichlaridan biridir, ammo baʼzida yengil infeksiyalarning belgisi boʻlishi ham mumkin.
• Farzandingiz oʻzini yomon his qilsa, ayniqsa, unda isitma, diareya kuzatilsa yoki kasallikning boshqa belgilari sizni tashvishlantirsa, shifokorga murojaat qiling.

Tish chiqayotganda nima qilish kerak?

Siz:

• farzandingizning milklarini barmogʻingiz yoki yumshoq choʻtka bilan asta-sekin massaj qilish;
• unga chaynashi mumkin boʻlgan biror narsa (tishyorgich yoki oʻyinchoq) berish;
• chaynamasdan yutsa boʻladigan boʻtqasimon ovqatlar tayyorlab berish orqali farzandingizga yordam berishingiz mumkin.