Pnevmokokk keltirib chiqaradigan kasalliklar

Kasallikning belgilari

Pnevmokokk bakteriyasi tomoq, quloq va burun boʻshliqlarining bakterial yalligʻlanishiga sabab boʻladi, shuningdek, oʻpkani (pnevmoniya), bosh miya qobigʻini (meningit), qonni (sepsis) zararlashi va boshqa bir qator ogʻir boʻlmagan kasalliklarga olib kelishi mumkin. Infeksiyalar 2 yoshgacha boʻlgan bolalarda koʻproq uchraydi, lekin katta yoshdagi bolalarda, ayniqsa, surunkali kasalliklarga chalingan va immuniteti zaif bolalarni oʻz ichiga olgan yuqori xavf guruhlarida ham kelib chiqishi mumkin.

Pnevmoniya gripp yoki boshqa viruslarning asoratlari sifatida paydo boʻlishi mumkin, u toʻsatdan quyidagi belgilar bilan namoyon boʻladi: isitma, balgʻamli yoʻtal, koʻngil aynishi, qusish, koʻkrak sohasidagi ogʻriq, nafas qisilishi, nafas olishning tezlashishi, uyqusizlik. 10–20% hollarda infeksiya qonga tushishi (sepsis) va davolanmasa, kasallik oʻlimga olib kelishi mumkin.

Pnevmokokk bolalarda bakterial meningit – bosh miya qobigʻi yalligʻlanishining asosiy sababchisidir. Bemor bolalarda holsizlik, asabiylashish, qusish, isitma, bosh ogʻrigʻi, talvasa va hushdan ketish kuzatilishi mumkin. Tegishlicha muolaja olib borilsa ham, bemor bolalarning 8% ga yaqini vafot etadi, koʻplab bolalarda esa eshitish qobiliyatining yoʻqolishi, aqliy qoloqlik, motorik buzilishlar, talvasa kabi doimiy nevrologik asoratlar saqlanib qoladi.

Davolash

Shifokorga oʻz vaqtida murojaat qilish muhim ahamiyatga ega. Pnevmokokk keltirib chiqaradigan kasalliklar antibiotiklar bilan davolanadi.

Oldini olish

Pnevmokokk keltirib chiqaradigan kasalliklardan eng yaxshi himoya bu emlash hisoblanadi. Shu bilan birga, bolani emizish, emlash orqali grippning oldini olish, bolani tamaki tutuni va boshqa havoni ifloslantiruvchi moddalarning taʼsiridan himoyalash, gigiyenaga qatʼiy rioya qilish kabi boshqa chora-tadbirlar ham yordam berishi mumkin.

Pnevmokokk infeksiyasiga qarshi emlash 3 bosqichda oʻtkaziladi – bola hayotining 2-, 3- va 12-oylarida.