Qanday qilib hasharotlar chaqishining oldini olish mumkin?

Baʼzi hollarda, ari, asalari yoki qovogʻarining chaqishi hayot uchun xavfli allergik reaksiyalarni keltirib chiqarishi mumkin, chivinlar esa turli yuqumli kasalliklarning muayyan tashuvchisi hisoblanadi. Hasharotlar toʻplanadigan joylardan saqlaning – tabiatda yoki hovlilardagi (hovuzlar, favvoralardagi) turgʻun suvlar, gulzor bogʻlari, maxsus goʻnglar (kompost), chiqindi qutilari va konteynerlari. Muntazam ravishda chiqindi idishini boʻshating va uy atrofidagi koʻlmaklardan xalos boʻling. Quyida hasharotlar chaqishidan himoya qilish uchun yana nima qilish mumkinligi keltirilgan:

• Yoʻlda harakatlanish paytida ehtiyot boʻling – hasharotlar transport vositasiga ochiq derazalar orqali kirib, haydovchi va yoʻlovchilarga zarar yetkazishi mumkin.
• Koʻchaga/balkonga olib boradigan deraza va eshiklarga himoya toʻrlarini oʻrnating va ularning holatini muntazam tekshirib turing.
• Hasharotlar uyalarini, ayniqsa bolalar oʻynaydigan joylar atrofidan toping va olib tashlang (mutaxassislarga murojaat qiling va yordam soʻrang).
• Shuningdek, oʻlik hasharotlarni ham olib tashlang. Ularning nayzasi, hasharot harakat qilmasligiga qaramay, hali ham xavflidir.
• Bolalar uchun toʻgʻri poyabzal tanlang. Yalangoyoq yurish yoki ustki qismi ochiq poyabzal (shippak, baletkalar) kiyishga ruxsat bermasdan, hasharotlar chaqishidan yaxshiroq himoya qiluvchi yopiq poyabzallarni tanlang.
• Xushboʻy hidli kosmetika va shaxsiy gigiyena vositalarini ishlatishdan saqlaning.
• Baʼzi oziq-ovqat va ichimliklar hasharotlarni oʻziga tortadi. Shirinliklar, muzqaymoq, mevalar, shirinlashtirilgan ichimliklar, tarvuz kabilar hasharotlarni oʻziga tortadigan mahsulotlarning ayrimlaridir. Ularni ochiq havoda isteʼmol qilmang va ovqatlanmagan paytda ustini yopib qoʻying.
• Bolaga xavfli hasharotlar bilan to‘qnashganda oʻzini qanday tutish kerakligini tushuntiring. Agar yaqin atrofda xavfli hasharotlar boʻlsa, ularni haydashga urinmang, qoʻllaringizni silkitmang, urishga urinmang, qochmang, lekin asta-sekin bu joydan uzoqlashing.
• Bolalarni chivin va kanalardan himoya qiling. Farzandlaringizga mos kiyimlarni kiydiring. Yorqin ranglar hasharotlarni oʻziga tortadi, ochiq ranglar esa ularni qochiradi.
• Chivinlar faol paytida (kechqurun) bolalarga uzun yengli koʻylak, shim, paypoq va bosh kiyim kiygʻizing. Shuningdek, bunday kiyim bolalarni oʻrmon boʻylab, baland maysalar orasidan yoki oʻt ustida yurganlarida chivinlardan yaxshi himoya qiladi. Toza havoda sayr qilib kelgach, bolaning sochlari, boshi, boʻyni, teri burmalari va butun tanadagi terisida kanalar yo‘qligini albatta tekshiring.
• Uy hayvonlarini ham sayr qilib kelgandan keyin tekshiring, chunki ular junida kanalarni tashishi mumkin.
• Farzandingizda hasharotlar chaqishidan allergik reaksiyalar boʻlsa, shifokor bilan maslahatlashing, qayta chaqish bilan kurashish rejasini tuzing va bolaga gʻamxoʻrlik qilayotgan yoki uning uchun vaqtincha javobgar boʻlgan kishini (qarindoshlar, tarbiyachilar yoki maktab oʻqituvchilari va boshqalar) bundan xabardor qiling.