Qanday qilib it tishlashining oldini olish mumkin?

• arzandingizga hech qachon begona yoki panjara ortidagi itga yolgʻiz oʻzi yaqinlashmaslikni oʻrgating.
• Agar it egasi bilan birga boʻlsa, bolaga uni faqat it egasining roziligi bilan silash mumkinligini oʻrgating. Itni silashdan oldin, siz va farzandingiz uning ishonchini qozonishingiz kerak – avvalo u sizga qarashiga va sizni hidlashiga imkon bering. Itning koʻziga qaramang va uning boshi, oyoqlari yoki dumini silamang.
• Bolalarga itlarga hurmat bilan munosabatda boʻlishni va ularning gʻashiga tegmaslikni oʻrgating – itlarni mazax qilmaslik, ularga birdan yaqinlashmaslik, toʻsatdan va tez harakatlar qilmaslik, shuningdek, ularning atrofida qichqirmaslik yoki shovqin qilmaslik.
• Bolalar itlar bilan qoʻpol tarzda oʻynashlariga yoki ular uxlab yotganida, ovqatlanayotganida yoki oʻz bolalarini parvarish qilayotganida bezovta qilishlariga yoʻl qoʻymang. Bu hayvonni hujumga undashi mumkin.
• Farzandingizga itni quloqlari va dumidan tortmaslikni oʻrgating; buning oʻrniga, itni junining oʻsish yoʻnalishi boʻyicha, boshidan dumigacha qanday qilib muloyimlik bilan silashni koʻrsating.
• Kichkintoyingizga itning ogʻzidan oʻyinchoqni tortib olmaslikni oʻrgating.
• Farzandingiz va it bir-birining ovqatidan yeyish ehtimoli borligi sababli bolani uning yonida ovqatlantirmang yoki it ovqatlanayotganida bola uni bezovta qilishiga yoʻl qoʻymang.
• Shuni unutmangki, itlarni quchoqlash va oʻpish ular uchun tabiiy hol emas va bunday harakatlar, ayniqsa bu sizning uy hayvoningiz boʻlmasa, uni qoʻrqitishi mumkin.
• Agar siz itning egasi boʻlsangiz, uni roʻyxatga oldirishni unutmang, veterinar tavsiyasiga koʻra quturish va boshqa kasalliklarga qarshi muntazam ravishda emlating.
• Farzandingizda itlardan qoʻrqish hissini uygʻotmang; ammo siz unga it baʼzan tajovuzkor boʻlishi mumkinligini tushuntirishingiz kerak, chunki u och, qoʻrqqan va hokazo boʻlishi mumkin.
• Agar bola itlardan qoʻrqsa yoki it uni qoʻrqitsa, unga qochib ketmaslikni, balki joyida turishni yoki sekin uzoqlashishni oʻrgating.
• Tajovuzkor it bilan toʻqnashganda nima qilish kerak? Agar bola irillayotgan, hurayotgan yoki boshqa tajovuzkor harakat qilayotgan itga duch kelsa, oʻzini xotirjam tutishi, baqirmasligi, itning koʻziga qaramasligi va asta-sekin undan uzoqlashishi kerak.

 

Agar it bolani yiqitsa, u gʻujanak boʻlib olishni, yuzi va koʻzlarini himoya qilish uchun boshi va oyoqlarini koʻkragiga bosishni, boshini qoʻllari bilan oʻrab olishi kerakligini bilishi lozim.