Qidiramiz: ikkita yoki uchta!

Kerak boʻladigan materiallar: uyingizda kundalik foydalaniladigan buyumlar: qoshiqlar, kiyim-kechaklar, kitob yoki jurnallar, rangli qalam yoki boʻrchalar.

Birgalikda nima qilishingiz mumkin: birgalikda ikki yoki uchta buyumni qidirib toping. Boshlash uchun: “Mana qoshiqlar. Ikkita qoshiq topa olamizmi? Qara, mana bitta, mana yana boshqasi. Jami IKKITA qoshiq boʻldi!” deyishingiz mumkin. Keyin bolangizga “yana ikkita qoshiq” topishni taklif qilishingiz mumkin. Ularni birlashtiring. Boshqa safar esa boshqa narsani qidirib topish mumkin, masalan, olmalarni – “Kel, ikkita olma olib kelaylik, bittasi senga, ikkinchisi esa menga!”

Farzandingizning qiziqishi va mahoratiga qarab koʻproq narsa topishingiz va sanashingiz mumkin. Doimo farzandingizga boʻlgan va kundalik ahamiyatga ega buyumlarni tanlang. Bunday topshiriqlar kundalik hayotning bir qismi boʻlishi mumkin, masalan, ovqat tayyorlash – “Iltimos, uchta stakan olib kel, biri senga, biri menga, biri buving uchun”. Baʼzan farzandingiz rasm, masalan, ikkita olma chizishdan ham xursand boʻlishi mumkin. Shuningdek, siz jurnaldan ham “ikkita” yoki “uchta” turli xil narsalarni qidirishingiz, jurnal eski boʻlsa, yopishtirish uchun rasmlarni kesib olishingiz mumkin.

Farzandingiz nimani oʻrganadi: farzandingiz raqamlar haqidagi tushunchasini rivojlantiradi – bu nafaqat xotirada saqlab hisoblash, balki raqamlarni obyektlarning mavjud guruhlari bilan bogʻlashdir. Bu mashgʻulotni kundalik hayotning bir qismiga aylantirar ekansiz, bolangizning kichik yoshidan ishtiyoqli va matematikaga qiziquvchan boʻlishiga yordam bergan boʻlasiz. Shu bilan birga, farzandingiz qanday qilib obyektlarning “bir-biriga tegishli boʻlishi” mumkinligini koʻproq tushunadi – bu esa saralash va tasniflashni oʻrganishning bir qismidir.