Pas largimit të tymit të duhanit!

Tymi i mbetur i duhanit (tymi terciar) - ekspozimi ndaj grimcave të nikotinës dhe kimikateve të tjera të dëmshme të duhanit, të cilat qëndrojnë për shumë kohë edhe pas pirjes së duhanit, për shkak të depozitimit të tyre në sipërfaqe të ndryshme.

Grimcat e krijuara nga djegia e duhanit qëndrojnë për një kohë të gjatë në garderobë, në sipërfaqet e mobiljeve, perdeve, tapetëve, në automjete etj. Këto grimca përzihen lehtë dhe shpejt me mikrobe/ndotje të tjera që gjenden në ambientet e mbyllura dhe krijojnë një përzierje shumë të dëmshme.

Ekspozimi ndaj produkteve të duhanit në këtë mënyrë është praktikisht i pashmangshëm - substancat e dëmshme futen thjesht duke prekur sipërfaqet e kontaminuara (ndotura), si dhe duke thithur ajrin në dhomat ku ndodh depozitimi.

Bishtat e cigareve janë një problem i veçantë - përveçse janë një nga ndotësit më të mëdhenj të mjedisit, ato janë një kërcënim serioz i menjëhershëm për shëndetin e njeriut. Në fakt, një përqindje e konsiderueshme e nikotinës dhe substancave të tjera të dëmshme qëndron në bishtat e cigareve dhe ato mund të çlirohen edhe disa ditë pasi cigarja është fikur.

Foshnjet dhe fëmijët e vegjël janë në rrezik të veçantë pasi:

  • nuk janë në gjendje të shmangin çdo lloj ekspozimi.
  • qëndrojnë në ambientet e mbyllura më gjatë.
  • kanë tendencën të prekin çdo gjë dhe ta vënë atë në gojën e tyre.

Përveç kësaj, numri i frymëmarrjeve në minutë është më i lartë te fëmijët sesa te të rriturit, kështu që sasia e substancave të dëmshme të absorbuara nga fëmija është më e lartë dhe ndikimi ndaj shëndetit është më drastik!

Shkencëtarët vijojnë të studiojnë dëmet që lidhen me këtë lloj ekspozimi ndaj duhanit. Ndërsa prisni njohuri të reja, e vetmja zgjidhje e besueshme është të zgjidhni ambiente pa duhan për veten dhe foshnjën tuaj, si dhe të krijoni ambiente të tilla!

  • Ndaloni plotësisht pirjen e duhanit në hapësirat ku jeni “përgjegjës”, në shtëpinë dhe makinën tuaj!
  • Nëse vendosni ta lejoni pirjen e duhanit në hapësirën ku banoni ju dhe fëmijët tuaj (gjë që ne kategorikisht NUK e rekomandojmë!):
    • Përpiquni të përcaktoni një dhomë të posaçme dhe fizikisht të ndarë, në të cilën fëmija juaj nuk qëndron kurrë!
    • Zbrasini mbetjet e duhanit rregullisht!
    • Pastroni rregullisht të gjitha sipërfaqet që janë në dispozicion dhe lani rrobat!
    • Ajroseni shpesh vendin ku qëndroni ju dhe fëmijët.
  • Për të dalë me fëmijët, zgjidhni restorantet, kafenetë dhe këndet e lojërave, ku pirja e duhanit është plotësisht e ndaluar!