Zhvillimi i funksionit të duarve nga muaji i shtatë deri në muajin e dymbëdhjetë

Rritja e fëmijës është proces i ndërlikuar në të cilin ndërthuren të gjitha fushat e zhvillimit: zhvillimi motorik, kognitiv, i të folurit dhe i gjuhës, zhvillimi i funksionit të duarve. Ekziston një thënie: "Duart tuaja janë reflektim i trurit". Dora përdoret për eksplorim, manipulim të objekteve, aktivitete të jetës së përditshme.

Zhvillimi motorik dhe i funksionit të duarve

Nëse në muajin e 4-të tashmë e kemi ulur fëmijën në sipërfaqe të sheshtë, ai/ajo fillon t'i hapë duart për mbështetje gjatë lëvizjes në sipërfaqe të sheshta që në muajin e 6-të.
Kur fëmija fillon të qëndrojë ulur, duke lëvizur përmes të ulurit në pozicione të tjera, ai/ajo fillon ta përdorë krahun dhe dorën e hapur për ta mbrojtur veten nga rënia me kokë.
Fëmijët që fillojnë të ngrihen përdorin duart për ta ngritur veten në këmbë.

Zhvillimi i kapjes

Me kontroll më të mirë motorik, dora bëhet më e saktë në kapjen, manipulimin dhe eksplorimin e asaj që ndodhet në mjedis.

Në tremujorin e tretë dhe të katërt, zhvillimi i funksionit të kapjes vazhdon si më poshtë:

lëvizja e lodrës nga njëra dorë në tjetrën;
mbajtja e lodrave me të dyja duart, duke i përplasur ato me njëra-tjetrën;
kapja e lodrave të madhësive dhe formave të ndryshme (rregullimi i hapjes së duarve);
përpjekja për të kapur dhe mbajtur deri në tri ose katër objekte me perimetër më të vogël;
shtrydhja e objekteve të buta;
shfletimi i librit;
hapja e kutive, heqja e kapakut të kutive, nxjerrja e pecetave nga paketimet;
ndarja e dy blloqeve të bashkuara;
veçimi i gishtit tregues për eksplorim, futja e gishtit në vrima, veçimi i gishtit tregues për të bërë me gisht;
tërheqja e një lodre të lidhur në pe;
dëshira për të ngritur gjëra më të rënda (shishe plot me ujë, kuti lodrash);
shtytja dhe tërheqja e kutive me lodra, mobiljeve (karrigeve, tavolinave, varëseve për tharjen e rrobave);
kapja e objekteve të vogla me majat e gishtërinjve, gisht të madh dhe gisht tregues, dhe më pas me majat e gishtit të madh dhe gishtit tregues (kapja me gisht të madh dhe gisht tregues).

Dora dhe ushqyerja

Kjo moshë karakterizohet edhe me fillimin e konsumimit të ushqimeve joqumështore. Ushqimi që kemi gatuar dhe përgatitur për përzierje ose pure duhet të kalojë "kontrollin e cilësisë përmes dorës". Lëreni fëmijën ta prekë, ta shtypë, të shpërndajë, ta hedhë, ta lëpijë, të futë ushqimin në gojë. Nëpërmjet duarve, fëmija do të marrë informacione cilësore se çfarë është ushqimi, cila është tekstura dhe forma e tij, çfarë arome ka, dhe më vonë se si shijon, si dhe do t'i vendosë në kujtesë të gjitha informacionet e nevojshme për të:

si të kapë ushqimin, çfarë lloj kapjeje të përdorë;
cila është tekstura e tij: e butë, e fortë, e lëmuar, e lagësht;
ai/ajo do të mësojë për madhësinë dhe formën: e madhe, e vogël, e rrumbullakët, drejtkëndëshe.

Këto gjëra janë gjithashtu të rëndësishme në përgatitjen për përtypje dhe të folur.

Dora shërben për t'u mbështetur, mbrojtur, për të kapur, për t'u mbajtur pas një objekti, për të manipuluar, "përjetuar" cilësi të ndryshme nga mjedisi. Fëmija "sheh" objekte me dorën e tij/saj duke përdorur një rrjet delikat mbaresash nervore dhe "plotëson" imazhin e asaj që e rrethon. Prandaj, eksploroni së bashku, natyrisht, duke u kujdesur për sigurinë e tij/saj (duke pasur kujdes nga objekte të mprehta, të vogla, substanca toksike si kimikate shtëpiake që ai/ajo mund t'i arrijë, objekte të lëvizshme që mund t'i tërheqë dhe të lëndohet nëse bien).