Магчымыя рэакцыі на ўвядзенне пяцівалентнай вакцыны ад гепатыту В, дыфтэрыі, слупняку, коклюшу і гемафільнай (ХіБ) інфекцыі

У некаторых выпадках вакцына, як і любыя іншыя лекі, можа выклікаць непажаданыя рэакцыі на яе ўвядзенне, звычайна лёгкія, непрацяглыя, якія праходзяць самі сабой.

У некаторых дзяцей могуць узнікнуць наступныя пабочныя эфекты:

• страта апетыту;
• неспакой, раздражняльнасць;
• непрывычная для дзіцяці плаксівасць;
• павышаная тэмпература, 38 °C і вышэйшая;
• пачырваненне, ацёк і боль у месцы ўколу;
• санлівасць;
• панос і рвота;
• балючае зацвярдзенне ў месцы ўвядзення вакцыны;
• бяссонніца.

Гэтыя рэакцыі праходзяць самі сабой на працягу 2–3 дзён.

Парада

Мясцовую рэакцыю здольны аблегчыць змочаны вадой кампрэс, можна даць дзіцяці парацэтамол — у зручнай для дзіцяці форме (сіроп, свечкі), у дозе, рэкамендаванай педыятрам (10–15 мг на кг масы цела за адзін прыём), каб аблегчыць боль і знізіць тэмпературу. Прыём парацэтамолу перад правядзеннем вакцынацыі не рэкамендаваны!

Часам у некаторых дзяцей могуць назірацца больш інтэнсіўныя рэакцыі на працягу 48 гадзін пасля вакцынацыі, такія як высокая тэмпература да 40 °C, бесперапынны плач працягласцю больш за 3 гадзіны, калапс ці стан, блізкі да шоку, сударгі з высокай тэмпературай або без яе (на працягу 3 дзён пасля вакцынацыі), а таксама мясцовы ацёк і пачырваненне, якое распаўсюджваецца на суседнія суставы. Гэтыя рэакцыі таксама праходзяць хутка і без умяшанняў.

Парада

Калі ў вашага дзіцяці ўзнікае нейкая з гэтых рэакцый, вам трэба звярнуцца да педыятра, каб пераканацца ў адсутнасці якіх-небудзь іншых праблем са здароўем. Таксама, калі ў вашага дзіцяці ўзнікла рэакцыя, якая не пералічана вышэй, вам неабходна паведаміць пра гэта свайму педыятру.

Сур’ёзныя алергічныя рэакцыі пасля вакцынацыі (сустракаюцца радзей, чым у 1:10 000 выпадкаў) узнікаюць вельмі рэдка, пакуль дзіця яшчэ знаходзіцца ў арганізацыі аховы здароўя.

Яны выяўляюцца ў выглядзе ацёку твару і шыі, парушанага і шумнага дыхання, моцнай раптоўнай слабасці з галавакружэннем і стратай прытомнасці, праблем са страўнікам (анафілактычная рэакцыя, шок).

Парада

Калі пасля выпіскі з медыцынскай установы ў вашага дзіцяці ўзнікнуць якія-небудзь з вышэйпералічаных праблем, адразу ж звярніцеся да педыятра ці ў аддзяленне хуткай неадкладнай дапамогі!

Пасля вакцынацыі пажадана назіраць за станам дзіцяці, чакаючы магчымых рэакцый на ўвядзенне вакцыны на працягу 10 хвілін пасля яе ажыццяўлення непасрэдна ў арганізацыі аховы здароўя.