Магчымыя рэакцыі на ўвядзенне вакцыны ад туберкулёзу (БЦЖ)

Перад выпіскай з радзільнага дома вашаму дзіцяці з мэтай фарміравання імуннай абароны ад туберкулёзу ў левае плячо была зроблена прышчэпка БЦЖ, якая змяшчае жывыя аслабленыя бактэрыі M. bovis (бацыла Кальмета — Герэна, БЦЖ).

Як і ў выпадку з іншымі імунабіялагічнымі прэпаратамі, у адказ на ўвядзенне гэтай прышчэпкі могуць з’явіцца рэакцыі арганізма, у тым ліку і непажаданыя.

У 95 % прышчэпленых ад туберкулёзу дзяцей развіваецца мясцовая спецыфічная рэакцыя на ўвядзенне вакцыны, якая праходзіць стадыі развіцця ад інфільтрата да язвы (да 10 мм у дыяметры) і гоіцца на працягу 2–5 месяцаў з утварэннем паверхневага рубчыка. Гэта лічыцца нармальнай рэакцыяй на вакцыну.

Назіранне за вакцыніраваным БЦЖ дзіцем «да адпадзення скарыначкі» ажыццяўляецца штомесяц.

Частата развіцця непажаданых рэакцый залежыць ад віду і дозы вакцыны, якая ўводзіцца, а таксама ад захавання тэхнікі правядзення ўнутрыскурнай ін’екцыі.

Да непажаданых рэакцый на ўвядзенне БЦЖ адносяць:

лакальныя скурныя праявы (падскурны інфільтрат, халодны абсцэс, язва, рэгіянарны лімфадэніт);
дысемініраваную БЦЖ-інфекцыю (у тым ліку БЦЖ-астыт, нефрыт, ваўчанку), якая сустракаецца з частатой 1,5–4,2 выпадку на 1 млн прышчэпленых здаровых дзяцей і не больш чым у 1 % прышчэпленых дзяцей з цяжкімі імунадэфіцытамі;
пост-БЦЖ-сіндром (інфекцыйна-алергічная праява ў выглядзе вузлаватай эрытэмы, кольцападобнай гранулемы).

Вызначаны алгарытм уліку, дыягностыкі і лячэння сур’ёзных непажаданых рэакцый на ўвядзенне вакцыны ад туберкулёзу (БЦЖ) у Рэспубліцы Беларусь рэгламентаваны заканадаўча.