Магчымыя рэакцыі на ўвядзенне вакцыны супраць гепатыту В

Вакцына супраць гепатыту В характарызуецца высокім узроўнем бяспекі і эфектыўнасці ў абароне ад віруснай інфекцыі.

Як і ў выпадку з прыёмам любога іншага лекавага прэпарату, у нязначнай колькасці дзяцей вакцына можа выклікаць часовыя мясцовыя і агульныя рэакцыі на яе ўвядзенне, такія як:

балючасць, пачырваненне, ацёчнасць або ўшчыльненне ў месцы ін’екцыі;
страта апетыту;
млявасць і санлівасць або раздражняльнасць і плаксівасць;
рвота, дыярэя;
нязначнае павышэнне тэмпературы цела.

Гэтыя часовыя рэакцыі — прыкметы імуннага адказу на ўвядзенне вакцыны, яны праходзяць на працягу некалькіх дзён.

Вельмі рэдка (менш за 1 з 10 000 выпадкаў) пасля вакцынацыі можа ўзнікнуць сур’ёзная алергічная рэакцыя ў выглядзе значнага ацёку твару і шыі (анафілаксія). Распаўсюджванне ацёку можа выяўляцца цяжкім дыханнем, асіпласцю голасу, гаўклівым кашлем, слабасцю з галавакружэннем і стратай прытомнасці. Такая рэакцыя патрабуе неадкладнай медыцынскай дапамогі, але ў большасці выпадкаў яна праяўляецца адразу пасля ўвядзення вакцыны, калі дзіця яшчэ знаходзіцца ў арганізацыі аховы здароўя.

Рэкамендацыі:

З мэтай назірання за станам і паводзінамі дзіцяці на працягу 30 хвілін пасля ўвядзення вакцыны неабходна заставацца ў арганізацыі аховы здароўя.

У выпадку развіцця ў вашага дзіцяці анафілаксіі ўжо пасля таго, як вы пакінулі арганізацыю аховы здароўя, неадкладна звярніцеся ў аддзяленне хуткай медыцынскай дапамогі.