Мастыт і абсцэс грудзей

Мастыт — гэта запаленне малочнай залозы, якое выяўляецца пачырваненнем скурнага покрыва над участкам запалення і балючасцю, суправаджаецца гарачкай. Адток малака з хворай малочнай залозы абцяжараны. Таксама могуць узнікаць гарачка, галавакружэнне, нядужанне і галаўны боль.

Калі мастыт не распазнаць на ранняй стадыі, ён можа перайсці ў абсцэс (утварэнне мясцовага нагнаення). Вобласць малочнай залозы над месцам абсцэсу гарачая, балючая, поўная вадкасці, ацёчная, таксама могуць з’явіцца гнойныя выдзяленні.

Сярод экспертаў няма адзінага меркавання наконт таго, ці заўсёды тэрмін «мастыт» азначае бактэрыяльную інфекцыю; безумоўна, гэта заўжды запаленчы працэс. Найбольш частай прычынай вострага мастыту з’яўляецца гнойны стафілакок, які выпрацоўвае таксіны. Яны выклікаюць такія сімптомы, як гарачка, дрыжыкі, нядужанне і ў самых цяжкіх выпадках абсцэс грудзей. Мастыт таксама можа быць выкліканы грыбкамі, асабліва калі ў дзіцяці малочніца поласці рота. Пры вострым мастыце агульны стан можа значна пагаршацца; але пры своечасовым і правільным лячэнні вы хутка паправіцеся.

Мастыт можа развіцца ў любы перыяд лактацыі, але часцей у першыя тыдні пасля родаў. У адрозненне ад набракання малочных залоз і застою малака мастыт узнікае ў адной з малочных залоз!

Прычыны мастыту

Усе фактары, якія прыводзяць да набракання грудзей, таксама спрыяюць развіццю мастыту. Да іх адносяць:

Трэшчыны саска.
Інфекцыю, якая распаўсюджваецца ад саска далей праз малочныя пратокі.
Няпоўнае апаражненне або застой малака ў пратоках малочнай залозы.
Інфекцыю ротавай поласці дзіцяці.
Раптоўнае перарыванне груднога выкормлівання.

Лячэнне мастыту

Звярніцеся да ўрача, які дасць рэкамендацыі па прыёме прэпаратаў для лячэння сімптомаў (болю і ліхаманкі) і прычыны запалення (інфекцыі).
Лячэнне антыбіётыкамі неабходна, калі ў маці тэмпература трымаецца больш за 24 гадзіны, калі сімптомы захоўваюцца пасля 24 гадзін частага і эфектыўнага кармлення грудзьмі або апаражнення грудзей, калі стан маці пагаршаецца.
Не спыняйце кармленне грудзьмі (калі гэта не рэкамендуецца ўрачом).
Пераканайцеся, што дзіця правільна прыкладаецца да грудзей, пры неабходнасці выпраўце становішча.
Пасля кожнага кармлення грудзьмі сцэджвайце малако з малочнай залозы з боку пашкоджання.
Пасля сцэджвання прыкладайце халодныя кампрэсы на працягу 15 хвілін кожную гадзіну.
Як мага больш адпачывайце, пакуль інфекцыя не адступіць, але не перарываючы грудное выкормліванне (адпачывае маці, а не грудзі!).

Пры рэцыдыве мастыту заўсёды паражаецца адна і тая ж вобласць, пачырваненне і прыпухласць не праходзяць; улічвайце наяўнасць абсцэсу (рэкамендуецца ультрагукавое даследаванне грудзей, на падставе атрыманых вынікаў, магчыма, неабходна будзе звярнуцца да хірурга). Пры ўзнікненні абсцэсу патрабуецца хірургічнае лячэнне (ускрыццё і дрэнажаванне поласці абсцэсу).

Калі ў вас узнікаюць пытанні ці сумненні наконт лактацыі і груднога выкормлівання, трэба звярнуцца па кансультацыю ў арганізацыю аховы здароўя, якая мае статус «Бальніца, добразычлівая да дзіцяці», дзе вам змогуць аказаць прафесійную падтрымку, а таксама дапамогуць супакоіцца.