Першы паход на пляж

Лепш за ўсё пачаць з купання дзіцяці ў невялікім басейне каля вадаёма. Ніколі не пакідайце дзіця без нагляду, нават калі ўзровень вады здаецца вам невысокім. У басейне адной рукой прытрымлівайце дзіця, а другой акуратна аблівайце яго вадой. Калі вы вырашыце пайсці разам да вадаёма, знаёмства з ім варта пачаць з асцярожнага апырсквання вадой, дзіця пры гэтым неабходна прытрымліваць рукой. Калі яно прывыкне да вады і яе тэмпературы, прапануйце надзець яму плавальны (надзіманы) круг.

Для груднічкоў і крыху старэйшых дзяцей ёсць надзіманыя кругі з адтулінамі для ног; у іх будзе больш бяспечна. Калі вы знаходзіцеся ў вадзе з дзіцем, вы павінны цвёрда стаяць на нагах, не трэба заходзіць у ваду глыбока. Немаўляці ва ўзросце 6 месяцаў не рэкамендуецца знаходзіцца ў вадаёме больш за 10–15 хвілін.

Калі ваша дзіця пакуль не кантралюе мочаспусканне і дэфекацыю, рэкамендуецца надзяваць на яго аднаразовыя падгузнікі для плавання.

Таксама неабходна абмываць скуру дзіцяці чыстай праточнай вадой кожны раз пасля купання ў басейне, моры, рацэ ці возеры і насуха выціраць яе ручніком, затым неабходна пераапрануць дзіця ў сухое адзенне. Для паходаў на пляж можна набыць спецыяльнае адзенне, якое дадаткова абараняе ад уздзеяння ультрафіялетавага выпраменьвання. Калі дзіця ўжо ўмее хадзіць, абавязкова абувайце яго.

Галаву дзіцяці трэба пакрываць сезонным галаўным уборам (з палямі шырынёй не меншай за 3 см), які абараняе твар, вушы і шыю.

Дзіцяці, старэйшаму за 12 месяцаў, трэба нанесці сонцаахоўны крэм, нават калі яно знаходзіцца пад пляжным парасонам, бо сонечныя прамяні адбіваюцца ад бетону, вады і пяску. Не забывайце пра вушы, патыліцу, спіну і плечы, рукі (асабліва заднюю іх частку), ногі і вобласць вакол краёў купальнага касцюма. Як правіла, дзіцячы сонцаахоўны крэм не змываецца вадой, тым не менш рэкамендуецца абнаўляць яго праз кожныя дзве гадзіны. Варта адзначыць, што лепшай абаронай будзе свабоднае адзенне з натуральных тканін светлых колераў, якое максімальна закрывае ўсе ўчасткі скуры.