Позы для кармлення грудзьмі

Карміць грудзьмі можна ў розных позах. Магчыма, у вас не атрымаецца прыняць рэкамендаваныя позы з-за боляў у спіне або боляў, звязаных з эпізіятаміяй або кесаравым сячэннем. Лепшая поза — тая, у якой вы адчуваеце сябе камфортна; з часам вы знойдзеце становішча, якое больш за ўсё падыходзіць вам і вашаму дзіцяці.

Незалежна ад позы пры кармленні важна выконваць асноўныя прынцыпы, дзякуючы якім дзіця зможа паспяхова смактаць грудзі: вы трымаеце немаўля побач з сабой так, каб яго галава знаходзілася на ўзроўні вашых грудзей. Галава, шыя і цела дзіцяці размяшчаюцца ў адной плоскасці, яго твар звернуты да грудзей. Нованароджанага пры кармленні варта падтрымліваць за ўсё цела, не толькі за галаву і шыю.

• Становішча седзячы з немаўлём на руках — «калыска». Ваш пазваночнік і пазваночнік дзіцяці размешчаны пад прамым вуглом адзін да аднаго; галава дзіцяці ляжыць у вас на згіне рукі; вы падтрымліваеце яго ўсёй рукой; свабоднай рукой дайце дзіцяці грудзі, змясціўшы вялікі палец на іх верхнюю частку, а ўказальны і сярэдні — пад грудзі, прытрымваючы іх далонню.

• Становішча седзячы з дзіцем на руках — «крыжаваная калыска». Дзіця ляжыць у вас на каленях ці на падушцы такім чынам, каб яно магло дацягнуцца да саска. Размясціце дзіця на падушцы так, каб яго вага прыходзілася не толькі на вашы рукі. Калі дзіця есць з левай малочнай залозы, падтрымлівайце яе U-падобна сагнутай левай рукой, а дзіця — далонню правай рукі.

• Становішча седзячы з дзіцем на руках — «захоп». Галава дзіцяці знаходзіцца спераду, а цела і ножкі — побач з вамі пад вашай рукой. Гэта добрая поза для мам, якія перанеслі кесарава сячэнне, і жанчын, якія кормяць двайнят. Таксама гэта пазіцыя падыходзіць тым, у каго павышанае рэфлекторнае выдзяленне малака. Падтрымлівайце галаву дзіцяці далонню. А каб яму было лягчэй дацягнуцца да саска, зноў скарыстайцеся падушкамі.

• Становішча лежачы, пры якім дзіця размяшчаецца на баку тварам да вас. Такая тая поза падыходзіць многім мамам, асабліва пры начных кармленнях, і аптымальная для тых, хто перанёс эпізіятамію. Вы з дзіцем ляжыце на баку тварам адзін да аднаго. Галава дзіцяці можа ляжаць на вашай выцягнутай руцэ, пры гэтым вы падтрымліваеце яго спіну перадплеччам. Будзьце асцярожны, каб не заснуць з немаўлём у ложку!

Поза падчас кармлення павінна быць зручнай для маці. Часам, імкнучыся наладзіць грудное выкормліванне, асабліва ў першыя дні, маці прымае розныя ненатуральныя і нязручныя позы, што непазбежна прыводзіць да боляў у спіне, шыі і іншых непрыемных адчуванняў. Дзіця можа есці па 10-12 разоў у суткі, таму важна, каб маме было зручна: павінна быць апора для спіны, а калі вы сядзіце на крэсле, то і для ног. Прыняць правільную позу можна з дапамогай дадатковых падушак — падушак-«гнёздаў» або звычайных, пры гэтым адну пакладзіце за спіну, а другую — на калені, каб пакласці дзіця.

Кармленне грудзьмі не павінна быць балючым. Спачатку пры кармленні грудзьмі можа ўзнікаць кароткачасовы дыскамфорт ці боль. Калі вы адчуваеце боль увесь час, значыць, дзіця няправільна захапіла сасок і смокча неэфектыўна. Спыніце кармленне: змясціце мезенец у рот дзіцяці побач з саском і акуратна дастаньце сасок, затым паспрабуйце яшчэ раз.

Маці і дзіця — гэта заўсёды асобны непаўторны свет. Нават тыя мамы, у якіх ужо ёсць дзіця, хутка разумеюць, што з новым дзіцем усё будзе па-іншаму і патрэбны час, каб пазнаёміцца і прывыкнуць адзін да аднаго. Маці і дзіця павінны навучыцца дзейнічаць як зладжаная каманда. Галоўнае — не здавацца, калі адразу не ўсё атрымліваецца так, як вы чакалі.

Калі ў вас ёсць пытанні наконт груднога выкормлівання, звярніцеся да кансультантаў па гэтых пытаннях або спецыялістаў арганізацыі аховы здароўя, якая мае статус «Бальніца, добразычлівая да дзіцяці» па прафесійную дапамогу і рэкамендацыі.