Прывязанасць і яе роля ў развіцці дзіцяці

Устойлівая эмацыянальная сувязь з бацькамі — ключавы фактар развіцця дзіцяці. Калі дзіця адчувае, што яго любяць і што яно ў бяспецы, яно актыўна даследуе навакольны свет. Надзейная прывязанасць паміж дзіцем і яго бацькамі садзейнічае развіццю гарманічнай і ўпэўненай у сабе асобы.

З таго моманту, калі жанчына даведваецца, што ў хуткім часе яна стане маці, паміж ёй і маленькім чалавекам узнікае нябачная сувязь, якая называецца прывязанасцю.

Прывязанасць — гэта форма эмацыянальнай камунікацыі, заснаваная на задавальненні дарослым патрэбы дзіцяці ў бяспецы і любві, якая толькі фарміруецца. З самага нараджэння дзіцяці яго бацькі імкнуцца клапаціцца пра яго, вучацца разумець і задавальняць усе патрэбы — як фізічныя, так і эмацыянальныя.

З першых дзён жыцця і на працягу ранняга ўзросту дзіцяці неабходна адчуваць сябе ў бяспецы. Заспакаенне, дапамога ў рэгуляванні эмоцый, падтрымка і заахвочванне, стварэнне ўмоў для даследавання і навучання — усё гэта здольна даць маці/бацька свайму дзіцяці. Эмацыянальная сувязь, якую адчувае ваша дзіця, фарміруецца дзякуючы таму, што вы робіце нешта разам, і залежыць ад таго, як вы праводзіце час і як дзіця сябе адчувае разам з вамі.

Развіццё ўстойлівай прывязанасці і эмацыянальнай бяспекі залежыць ад таго, наколькі цёпла і ласкава вы адказваеце на патрэбы вашага дзіцяці. Асновай ранніх адносін могуць быць усмешка і лагодны погляд дарослага, абдымкі і размова з дзіцем, сумесныя гульні і забавы.

Па меры таго, як ваша дзіця будзе сталець, вы будзеце знаходзіць усё новыя і новыя спосабы камунікацыі з ім, захоўваючы і развіваючы прывязанасць.