Як падрыхтаваць маленькае дзіця да наведвання стаматолага

Наведваць стаматолага трэба рэгулярна. Заплануйце першы візіт, калі дзіцяці будзе 12 месяцаў, а затым прыходзьце адзін-два разы на год. Стаматолаг агледзіць рот і зубы дзіцяці і раскажа вам пра іх догляд, меры іх абароны і магчымую рызыку, якая можа прывесці да ўзнікнення карыесу. На прыёме спецыяліст:

• пакажа, як даглядаць зубы дзіцяці, магчыма, правядзе планавыя працэдуры: ачысціць налёт і нанясе прэпараты з фторам для забеспячэння дадатковай абароны;
• у выпадку выяўлення карыесу запіша на лячэнне. Па магчымасці заплануйце візіт на раніцу, калі дзіця адпачне і добра выспіцца.

Перад наведваннем стаматалагічнага кабінета дружалюбна і даступна раскажыце дзіцяці пра тое, чаго чакаць, каб яно не спалохалася незнаёмай для яго сітуацыі, падрыхтуйце дзіця. Выкарыстайце наступныя рэкамендацыі:

• Няхай размова будзе нязмушанай, растлумачце, напрыклад, чаму да стаматолага хадзіць цікава.
• Выкарыстоўвайце зразумелыя дзіцяці словы, скажыце, што стаматолаг «паглядзіць зубкі з асаблівым люстэркам», «палічыць» і, можа быць, «пачысціць» іх.
• Калі вы папярэдне пагуляеце ў «стаматолага» дома, дзіцяці будзе лягчэй зразумець, што адбываецца. Спачатку «стаматолагам» будзеце вы: палічыце і пачысціце зубы дзіцяці. Затым памяняйцеся ролямі.
• Дзіцяці будзе лягчэй пагадзіцца на лячэбную працэдуру, калі вы прадставіце карыес як чарвяка, а інструменты для лячэння зубоў — як асаблівую птушачку. Пазбягайце такіх слоў, як боль, свідраванне, іголка, — яны, хутчэй за ўсё, засмуцяць і напалохаюць дзіця.
• Пачытайце з дзіцем кніжкі пра паход да стаматолага, паглядзіце разам малюнкі або забаўляльны відэаролік, які адпавядае ўзросту.

Пасля наведвання стаматалагічнага кабінета абавязкова спытайце дзіця, як усё прайшло. Самі падавайце яму добры прыклад у тым, што датычыцца штодзённага догляду зубоў і рэгулярнага наведвання стаматолага.