Одржување на лактација

Новороденчињата во одделите за специјална и интензивна нега можат да цицаат ако имаат координиран рефлекс на цицање-голтање-дишење (обично околу 34-та гестациска недела), не се на механичка вентилација и се клинички стабилни.

Предвремено родени бебиња под 34 гестациска недела, деца на механичка вентилација или оние чија болест се влошува не можат да цицаат. Децата со расцеп на непцето, други абнормалности, како што се срцеви мани, невролошки или генетски нарушувања, како што е Даунов синдром, може да имаат потешкотии во цицањето. Во овие ситуации, бебето може да се храни со мајчино млеко на начин што најдобро одговара на неговата состојба, се додека не може да цица.

Ако сте одвоени од вашето новороденче повеќе од шест до осум часа (предвремено родено бебе, болно новороденче сместено на одделение за интензивна нега или префрлено во друга институција), треба да започнете со празнење на градите. На овој начин, ќе го стимулирате производството на млеко и ќе му овозможите на вашето бебе да го добие вашето млеко, најдобрата можна храна.

Вашето млеко е најдобрата храна за вашето бебе. Кога сте разделени од вашето предвремено родено или болно дете, ви се чини дека не можете да направите ништо за него. Вашето млеко е всушност нешто што само вие можете да му го дадете на вашето бебе.

Совети за рачно измолзување на мајчиното млеко

• Мора редовно да ги празните градите, 6-8 пати во текот на 24 часа, за да ја имитирате стимулацијата на градите што ја дава здраво новороденче кое редовно цица.
• Рачното измолзување треба да трае 20 минути; периодот помеѓу две сесии не треба да биде подолг од 5 часа, и тоа треба да го направите барем еднаш во текот на ноќта.
• Во првите неколку сесии, количината на млеко може да биде минимална; ќе се зголемува со вежбање.
• Може да го активирате рефлексот за исфрлање млеко (рефлекс на окситоцин) кога сте во удобна и опуштена положба, размислувате за вашето бебе, ја држите неговата фотографија или играчка, го гледате ако сте заедно, нежно ги загревате и масирате градите, со нежно стимулирање на брадавицата помеѓу палецот и показалецот.
• Важно е да се води грижа за хигиената на рацете и хигиената на приборот за собирање и чување млеко.
• Како и доењето, измолзувањето со раце е вештина што се учи. Ќе ги добиете потребните совети и помош од персоналот во родилиштето или одделот за интензивна нега; не плашете се да побарате помош.

Рачно измолзување се препорачува на почетокот. Во прилог на собирање млеко, измолзувањето може да помогне во ублажување на непријатното чувство на тежина во градите, да се намали отокот на ареолата на набрекнатите гради, така што бебето ќе може да се закачи за брадавицата, да почне да цица и да ги ослободи запушените млечни канали. Во овие случаи, измолзувањето трае многу пократко.

Пумпите, рачни или електрични, можат значително да го олеснат собирањето млеко, особено ако детето нема да може да цица долго време, или мајката и детето се разделени од други причини (болест на мајката или рано враќање на работа). Електричните пумпи од новата генерација се прилагодени на различните потреби на мајките; недостаток е нивната висока цена. Опремата за пумпање мора да се одржува и стерилизира според упатствата на производителот.

Одржувањето на лактацијата може да биде тешко и напорно за мајката, особено ако таа е одвоена од детето долго време. Ако не успеете, треба да знаете дека постојат специјализирани вештачки млека, прилагодени на потребите на вашето дете. Покрај исхраната, топлата и поддржувачка врска и љубов што му ја давате на вашето дете игра клучна улога во неговиот оптимален раст и развој.