Првите чекори на поврзување со бебето

Да се стане родител значи, пред сè, да го запознаете вашето дете и да најдете начин да бидете извор на сигурност, прифаќање и градење доверба. Понекогаш може да имаме впечаток дека има некои - доволно добри - упатства за децата кои важат за сите нив, вклучително и општи упатства за грижа за децата. Реалноста, сепак, е дека секое дете е сосема различно и патот до тоа да станете добар родител е всушност вашето уникатно искуство со сопственото дете.

Науката вели дека првиот чекор во квалитетното родителство, како и здравиот развој на вашето дете - е наоѓање начин за поврзување со бебето.

Поврзувањето со бебето значи да се одговори на потребите на бебето со нежност, љубов и грижа. Кога се однесувате вака, станувате посебни за бебето, некој на кој му верува и се потпира, некој со кој се смирува, учи нови вештини, учи за себе и за светот.

Градењето врска помеѓу вас и вашето бебе е еден од клучните аспекти на развојот. Кога вашето бебе ќе го добие она што му треба од вас: насмевка, заштита, гушкање, нежност - тоа чувствува дека е безбедно и дека светот е безбедно место за учење, играње и истражување. Ова ја формира основата на менталното здравје, благосостојбата и севкупниот развој на вашето дете во текот на детството и подоцна во животот.

За да се поврзете со бебето, пред сè, важно е да следите - гледајте, слушајте, забележувајте работи за вашето бебе (што сака, што го смирува, што го вознемирува, како реагира на болка, звуци...). Следно, важно е да го разберете „јазикот“ на вашето бебе. Бебињата обично „зборуваат“ така што ги вртат очите и главата, го насочуваат погледот или движењето кон вас, одржуваат контакт со очите, ја вртат главата кон звукот на вашиот глас, испуштаат звуци или плачат, опуштен поглед, заинтересиран поглед или движење на рацете и нозете додека се во контакт со вас. Следете ги овие однесувања кај вашето дете и обидете се да одговорите на нив.