Што можете да направите ако препознаете злоупотреба на деца и/или занемарување во вашата околина?

Ако забележите некој од следниве знаци кај децата во вашата околина, може да се сомневате дека тоа е случај на злоупотреба и занемарување: 

• Недоверба кај детето или голема претпазливост кон сите возрасни; 
• Екстремно агресивно, покорно, загрижено или вознемирено однесување на детето; 
• Ниска самодоверба, повлекување или тешкотии во воспоставувањето односи со возрасни или други деца; 
• Прекумерна послушност и смиреност со цел да ги задоволи возрасните; 
• Тешкотии со концентрацијата; 
• Прекумерно нишање, мрморење, цицање или грицкање; 
• Чести кошмари или тешкотии со спиењето; 
• Ви се чини дека детето е склоно кон незгоди или има необјаснети модринки или повреди во различни фази на лекување; 
• Нејасни објаснувања за повреди кои не се совпаѓаат со видот на повредата; 
•  Детето не сака да си оди дома ако е на друго место (или да оди на друго место); 
•  Несоодветна употреба на сексуални термини или однесување поврзано со возраста и развојот на детето. 

Што можете да направите ако се сомневате дека дете од вашата околина е злоупотребено или запоставено: 

• Бидете чувствителни на какви било предупредувачки знаци за можна злоупотреба или занемарување; 
• Понудете му на детето да разговара со вас во секое време; 
• Разговарајте нежно и  без осуда. 
• Покажете загриженост ако детето изгледа тажно или лошо, бидејќи тоа може да го мотивира детето да го сподели своето искуство со вас. 
• Не вршете притисок врз детето да одговори на вашите прашања, или “не му ставајте зборови во устата”; 
• Контактирајте ги локалните институции за заштита на деца (Полиција или Центар за социјална работа). Тие ќе преземат заштитни мерки и може да ве известат за следните чекори. Ако сте загрижени за вашата безбедност, можете да останете анонимни. 
• Грижете се за себе, оваа тема може да биде многу вознемирувачка. Ако треба да разговарате со некого за тоа како се чувствувате, контактирајте експерти за поддршка.