Тетанус

Тетанус е акутна и многу смртоносна болест предизвикана од бактеријата Clostridium tetani. Бактериите можат да заразат рани и да произведуваат протеин (токсин) што влијае на нервниот систем што може да доведе до грчеви во мускулите и неможност за дишење.

Бактеријата Clostridium tetani се наоѓа насекаде во природата, а најмногу во почвата и во цревата на животните. Може да навлезе во телото на вашето дете преку загадена повреда на кожата, каснување од животно или изгореници. Во нашата средина, децата се успешно вакцинирани против оваа болест, така што болеста е речиси исчезната.

Знаци и симптоми на болеста

Обично болеста се појавува 1-2 недели по инфекција. Инфекцијата со тетанус доведува до силна болка и грчеви низ телото. Болните грчеви во мускулите започнуваат на лицето, потоа на вратот, телото и нозете. Кога се зафатени мускулите на лицето и вратот, детето има проблеми со голтање и дишење. Пред ерата на вакцинација, оваа болест беше фатална во повеќето случаи (стапка на смртност од 80%).

Треба да се консултира педијатар кога:

Детето е каснато од животно
Детето има валкана рана или има длабока расеченица, убодна рана или гребаница од валкан или зар'ѓан предмет

Третман на тетанус

Третманот на тетанус е комплициран и се изведува во болнички услови. Вклучува употреба на антитоксини и антибиотици, чистење на раната, понекогаш и операција. Доколку е потребно, се користат лекови за ублажување на болката, вкочанетост на мускулите, како и уреди за поддршка на дишењето.

Превенција на тетанус

Тетанус е болест која не може да се искорени бидејќи бактериите се присутни насекаде во природата. Нема стекнат имунитет дури и по инфекцијата. Најдобар начин да го заштитите вашето дете од оваа болест е да го вакцинирате навреме. Според препораките за имунизација, вакцините против тетанус се даваат во три дози: првата на возраст од шест недели, додека втората и третата доза се даваат во интервали од 4 до 8 недели. Вакцинацијата против тетанус обично се дава заедно со вакцината против: дифтерија, голема кашлица, детска парализа и болести предизвикани од бактеријата Haemophilus influenza b.

Во случај на повреда на отворена кожа, важно е внимателно да ја исчистите раната и да го отстраните целиот туѓ материјал од неа. Ако вашето дете не било соодветно вакцинирано или било нецелосно вакцинирано, или било соодветно вакцинирано, но поминале повеќе од 5-10 години од последната доза на вакцината (во зависност од тежината на раната), детето ја нема потребната заштита. Однесете го на педијатар за да го провери статусот на вакцинација и да утврди дали треба да ја прими вакцината, а во некои ситуации и човечки тетанус имуноглобулин (ТИГ).

Новороденче кое е родено без професионална медицинска помош, со ризик да се зарази со бактеријата Clostridium tetani, треба итно да прима човечки тетанус имуноглобулин.