Hapat dhe procedurat rutinë pas lindjes së fëmijës

Menjëherë pas lindjes dhe gjatë qëndrimit të të porsalindurit në spitalin e maternitetit, kryhen hapat dhe procedurat e zakonshme. Këto të fundit kanë ndryshuar gjatë dekadave falë njohurive rreth fiziologjisë dhe rreth nevojave të porsalindurve.

Fshirja e lëkurës

Fshirja e lëkurës stimulon foshnjën të fillojë të marrë frymë vetë dhe parandalon humbjen e nxehtësisë. Lëkura e lagur e të porsalindurit, veçanërisht lëkura e kokës e humbë shpejtë nxehtësinë dhe mamia duhet ta fshijë dhe ngrohë fëmijën sa më shpejt që të jetë e mundur.

Duke e prerë kordonin e kërthizës, i porsalinduri më në fund ndahet nga trupi i nënës dhe fillon udhëtimin e tij/saj të pavarur në jetë. Rekomandohet të mos e kapni kordonin e kërthizës (vendosja e një kapëse ndërpret rrjedhën e gjakut nëpër kordonin e kërthizës) të paktën deri 60 sekonda pas lindjes. Kjo ndihmon që fluksi i gjakut dhe frymëmarrja e fëmijës të përshtaten, dhe foshnja gjithashtu të marrë gjak shtesë nga kordoni i kërthizës, e cila ka një efekt të dobishëm në parandalimin e anemisë në muajt e mëvonshëm. Pas kësaj, kordoni i kërthizës pritet me gërshërë dhe lidhet me një shirit, ose vendoset një kapëse e veçantë mbi të. Nëse babai merr pjesë në lindje, atij zakonisht i ofrohet prerja e kërthizës. Prerja dhe ndihma në prerjen e kordonit të kërthizës nuk e dëmton foshnjën!

Kontakti lëkurë me lëkurë

Ky është hapi tjetër, nëse foshnja është i/e shëndoshë dhe nëna ndihet mirë.

Vendosja e një shiriti identifikues në dorë

Ky është hapi tjetër sipas procedurave të lindjes; rripat e identifikimit në dorë fiksohen në kyçet e nënës dhe të të porsalindurit.

Matja e të porsalindurit (gjatësia, pesha dhe perimetri i kokës)

Është mirë që ky hap të shtyhet pas kontaktit lëkurë me lëkurë dhe pas ushqyerjes së parë me gji.

Nuk rekomandohet larja e të porsalindurit, pasi nxitë ftohjen dhe largon shtresën mbrojtëse nga lëkura.
Nuk rekomandohet të ndani të porsalindurin nga nëna, përveç rasteve ku nëna ose fëmija kanë ndonjë gjendje shëndetësore emergjente.

Procedurat, vaksinat dhe ekzaminimet parandaluese

Menjëherë pas lindjes, foshnja merr vitaminën K (një injeksion i vogël muskulor i dhënë në pjesën e përparme të kofshës së porsalindur) në mënyrë që të parandalojë sëmundjen hemorragjike te të porsalindurit. Ditën e parë, foshnja merr dozën e parë të vaksinës kundër hepatitit B; administrohet në të njëjtën mënyrë si vitamina K, vetëm në këmbën tjetër. Para lirimit nga spitali, ai/ajo merr vaksinën kundër tuberkulozit (vaksinën BCG); aplikohet në lëkurë në pjesën e jashtme të krahut të majtë. Një mostër gjaku merret nga të gjitha foshnjat për kontroll metabolik. Në përputhje me rekomandimet kombëtare, të gjithë fëmijët e porsalindur i nënshtrohen kontrollit të dëgjimit.