Larja e dhëmbëve: foshnjat dhe fëmijët e vegjël

Para daljes së dhëmbit të parë, mishrat e dhëmbëve të fëmijës duhet të fshihen me garzë të butë pambuku, të njomur me tretësirë të kripur disa herë gjatë ditës. Kur të dalë dhëmbi i parë, filloni t'ia lani menjëherë.

Larja e dhëmbëve të foshnjës

• Pozicionoje foshnjën në mënyrë që t'i shihni gojën dhe ta bëni të ndihet i/e sigurt; është më mirë ta mbani kokën e tij/saj në prehrin tuaj. Me dorën tuaj të lirë, mbajeni mjekrën e tij/saj ndërsa koka e tij/saj është e mbështetur në trupin tuaj.
• Ngrini buzën e foshnjës për të parë dhëmbët dhe filloni t'ia lani me lëvizje të buta rrethore, duke u kujdesur që të përfshini çdo dhëmb të dalë, fillimisht nga jashtë dhe më pas nga brenda.
• Në fillim fëmijës nuk do t'i duket interesant ky veprim, por për ta bërë pjesë të rutinës së përditshme, bëjeni të këndshëm duke i kënduar një këngë ose duke i dhënë fëmijës një lodër për të luajtur.  

Larja e dhëmbëve të një fëmije të vogël

• Do të lani edhe dhëmbët e një fëmije të vogël. Në fillim, do të jetë ekskluzivisht puna juaj; megjithatë, kur fëmija tregon interes për të larë dhëmbët vetë, përshtatuni nevojave të tij/saj, por kini parasysh se ndihma dhe mbikëqyrja nevojiten deri në moshën e fillimit të shkollës dhe për disa fëmijë - edhe më gjatë.  
• Qëndroni ose uluni para një pasqyre, pas fëmijës suaj në mënyrë që ai/ajo të shohë se çfarë po bëni dhe të ndihet i sigurt.
• Mbajeni mjekrën e fëmijës me dorën tuaj të lirë dhe mbështeteni kokën e tij/saj në trupin tuaj.
• I thoni fëmijës të hapë gojën dhe të fillojë të lajë çdo dhëmb nga jashtë dhe më pas nga brenda, me lëvizje të buta rrethore. Në sipërfaqet përtypëse, pastroni me lëvizje mbrapa dhe para. Pastrojeni butësisht edhe gjuhën e fëmijës.
• Pas pastrimit, nxiteni fëmijën tuaj të pështyjë pastën e dhëmbëve. Nuk është e nevojshme shpëlarja e gojës.
• Ndërsa lani dhëmbët e fëmijës suaj, sigurohuni që ky aktivitet të jetë argëtues duke kënduar ose folur.
• Kur fëmija fillon të lajë dhëmbët e tij/saj, monitoroni se si e bën këtë dhe në fund përfundoni larjen e dhëmbëve të pasmë që ai/ajo nuk ka mundur t'i arrijë.  

Përzgjedhja e furçës së dhëmbëve

• Ekzistojnë furça dhëmbësh për fëmijë të moshave të ndryshme. Kanë koka të vogla ovale, qime të buta me gjatësi të ndryshme dhe doreza me veshje që nuk rrëshqasin. Dorezat zakonisht janë të dizajnuara në një mënyrë argëtuese për të qenë interesante për fëmijën.
• Pas përdorimit, furça e dhëmbëve lahet, vendoset në një pozicion vertikal dhe lihet të thahet në ajër.
• Ndërroni furçën e dhëmbëve çdo 3-4 muaj ose më herët nëse qimet fillojnë të konsumohen.   

Zgjedhja e pastës së dhëmbëve

• Pasta e dhëmbëve për fëmijë duhet të përmbajë një sasi të vogël të mineralit fluor, sepse forcon dhëmbët dhe parandalon prishjen e tyre.
• Fillohet të përdoret kah fundi i vitit të dytë fillimisht në sasi të vogël sa një kokërr orizi dhe më vonë deri në madhësinë e një bizele.

Pastrimi dhe larja e rregullt e dhëmbëve të fëmijës suaj duhet të bëhet pjesë e rutinës së përditshme që nga dalja e dhëmbit të parë.