Bronkiti

Shkaqet e bronkitit

Bronkiti ndodh kur pezmatohen kanalet e mëdha të rrugëve të frymëmarrjes që shkojnë në mushkëri, zakonisht për shkak të një infeksioni viral, ose më rrallë një infeksioni bakterial.

Simptomat e bronkitit

Kollitja është simptoma kryesore e bronkitit. Kolla e fëmijës suaj mund të tingëllojë e thatë ose e lagur.

Nëse fëmija juaj ka bronkit dhe janë prekur rrugët e sipërme të frymëmarrjes, atij/asaj mund t’i rrjedhë hunda, të ketë dhimbje të fytit, si dhe të kollitet. Ai/ajo mund të ketë ethe të lehta, mund të marrë pak frymë dhe të ketë një fishkëllimë në gjoks.

Nëse fëmijës tuaj i fishkëllon gjoksi dhe ka frymëmarrje të shkurtër, kjo mund të jetë astmë ose bronkiolit. Kollitja e rëndë dhe fishkëllima te fëmijët ka më shumë të ngjarë të shkaktohet nga astma sesa nga bronkiti. Nëse fëmija juaj ka temperaturë të lartë dhe vështirësi në frymëmarrje, mund të jetë pneumoni.

Mjeku juaj do të zbulojë se çfarë i shkakton simptomat e fëmijës tuaj.

Bronkiti është më i zakonshëm tek të rriturit, por mund të shfaqet tek fëmijët.

Nëse kollitja fillon papritur dhe dyshoni se fëmija juaj mund të ketë gëlltitur diçka, duhet të filloni dhënien e ndihmës së parë pasi fëmijës i është zënë fryma, si dhe të kërkoni kujdes të menjëhershëm mjekësor.

Kur duhet të vizitoni mjekun tuaj për simptomat e bronkitit

Ju duhet ta dërgoni fëmijën tuaj për kontroll te mjeku, nëse fëmija juaj:

• ka pasur sulme të astmës në të kaluarën
• ka temperaturë të lartë
• ka një kollë që nuk qetësohet pas 5-7 ditësh
• ka fishkëllimë kur merr frymë
• ka gjak në sekrecionet që liron
• ka probleme me frymëmarrjen ose merr frymë rëndë.

Testet për bronkit

Mjeku juaj mund të tregojë nëse fëmija juaj ka të ngjarë të ketë bronkit, duke ju bërë pyetje në lidhje me simptomat e fëmijës tuaj dhe duke ekzaminuar fëmijën tuaj.

Mjeku gjithashtu mund ta referojë fëmijën tuaj për një rreze X në gjoks, nëse nuk kalon kolla.

Trajtimi i bronkitit

Bronkiti zakonisht kërkon 1-2 javë për t’u zgjidhur vetë dhe zakonisht nuk shkakton ndonjë ndërlikim.

Nëse kollitja dhe gulçima e fëmijës suaj nuk kalojnë, mjeku juaj mund të këshillojë përdorimin afatshkurtër të ilaçeve kundër astmës.

Nëse mjeku juaj mendon se një infeksion bakterial është duke shkaktuar bronkit ose nëse kollitja nuk do të kalojë, atëherë mund të përshkruajë antibiotikë. Megjithatë, antibiotikët nuk përshkruhen shpesh, sepse bronkiti zakonisht shkaktohet nga një virus, ndërsa antibiotikët nuk do të funksionojnë për viruset.

Ilaçet për kollën zakonisht nuk ndihmojnë në kollën e bronkitit. Mjalti mund të zvogëlojë ashpërsinë dhe kohëzgjatjen e kollës së bronkitit, por nuk duhet t'u jepni mjaltë fëmijëve të moshës nën 12 muajsh për shkak të rrezikut të botulizmit të foshnjave, një lloj i rrallë por serioz i helmimit nga ushqimi.