Tishlarni tozalash: chaqaloqlar va yosh bolalar

Birinchi tish chiqishidan oldin bolaning milkini fiziologok eritmaga botirilgan yumshoq paxtali doka bilan kun davomida bir necha marta artib turish kerak. Birinchi tish paydo boʻlishi bilanoq tozalashni boshlang.

Bolaning tishlarini tozalash

• Bolani shunday joylashtiringki, uning ogʻzi sizga koʻrinib tursin va u oʻzini xavfsiz his qilsin; eng yaxshisi, uning boshini tizzangizda tutib turing. Bolaning boshini tanangizga suyagancha boʻsh qoʻlingiz bilan iyagidan ushlab turing.
• Bolaning labini koʻtarib, tishlarini koʻring va yengil aylana harakatlar bilan tozalashni boshlang, har bir chiqqan tishni oldin tashqi tomondan, keyin ichki tomondan tozalang.
• Dastlab bolaga bu harakat qiziq boʻlmaydi, lekin uni kundalik hayotning bir qismiga aylantirish uchun qoʻshiq kuylash yoki bolaga oʻyinchoq berish orqali yoqimli mashgʻulotga aylantiring.

Yosh bolaning tishlarini yuvish

• Yosh bolaning tishlarini siz yuvasiz. Boshida bu faqat sizning vazifangiz boʻladi, ammo farzandingiz tishlarini choʻtka bilan tozalashga qiziqsa, uning ehtiyojlarini inobatga oling, lekin maktab yoshiga kirguncha, baʼzi bolalar uchun esa undan keyin ham yordam va nazorat kerak boʻlishini esdan chiqarmang.
• Boʻsh qoʻlingiz bilan bolaning iyagidan ushlab, boshini tanangizga suyang.
• Bolaga ogʻzini ochishini ayting va har bir tishni tashqi tomondan, keyin ichkaridan yengil aylana harakatlar bilan yuvishni boshlang. Tish yuzalarini oldinga va orqaga harakatlar bilan tozalang. Bolaning tilini ham muloyimlik bilan yuving.
• Tozalashdan keyin bolangizni tish pastasini tupurib yuborishga undang. Ogʻizni chayish shart emas.
• Farzandingizning tishlarini yuvayotganda qoʻshiq aytish yoki u bilan suhbatlashish orqali bu mashgʻulotni qiziqarli qiling.
• Bola tishlarini mustaqil yuva boshlagach, buni qanday bajarayotganini kuzatib turing va oxirida u yeta olmagan orqa tishlarni oʻzingiz tozalang.

Tish choʻtkasini tanlash

• Turli yoshdagi bolalar uchun moʻljallangan tish choʻtkalari mavjud. Bu choʻtkalarning bosh qismi choʻzinchoq shaklda, har xil uzunlikdagi yumshoq tuklari va sirpanmaydigan qoplamali tutqichlari bor. Tutqichlar odatda bolaga qiziqarli boʻlishi uchun antiqa koʻrinishda ishlab chiqariladi.
• Ishlatilgandan keyin tish choʻtkasi yuvilib, tik holatda joylashtiriladi va havoda qurishi uchun qoldiriladi.
• Tish choʻtkasini har 3–4 oyda bir marta yoki tuklar eskirishni boshlaganda oʻzgartiring.

Tish pastasini tanlash

• Bolalar tish pastasining tarkibida oz miqdorda ftorli mineral boʻlishi kerak, chunki u tishlarni mustahkamlaydi va zararlanishdan himoyalaydi.
• Bola ikki yoshga toʻlganda tish pastasidan foydalanish mumkin, u dastlab oz miqdorda, guruch kattaligida, keyin esa noʻxat kattaligida ishlatiladi.

Birinchi tish paydo boʻlgan paytdan boshlab farzandingizning tishlarini muntazam tozalash kundalik hayotning bir qismiga aylanishi kerak.