Rekomandime për aktivitetin fizik, kohën e qëndrimit para ekranit dhe gjumin për fëmijën në vitin e tretë të jetës dhe vitet në vijim

Aktivitetet e planifikuara ditore për një fëmijë duhet të përshtaten me moshën e tij/saj, por edhe me nevojat individuale. Krahas ushqimit, duhet menduar për kohën për lojë dhe aktivitet fizik, gjumin dhe periudhat kur fëmija është ulur, por merret me aktivitete të tilla si: biseda me anëtarët e familjes, dëgjimi i historive, qëndrimi para ekranit, qëndrimi në veturë, ngrënia.

Fëmijët e moshës tre vjeç e më shumë

• Në këtë moshë, fëmija duhet të kalojë të paktën 180 minuta gjatë gjithë ditës në një shumëllojshmëri aktivitetesh fizike, nga të cilat të paktën 60 minuta janë aktivitet fizik me intensitet mesatar deri në intensitet të lartë.
• Pozicioni i pushimit relativ nuk rekomandohet të zgjasë më shumë se 1 orë. Përdoreni këtë kohë për biseda, vizita tek ndonjë vend interesant, lexim, rrëfim tregimesh. Një orë është gjithashtu koha më e gjatë para ekranit për një fëmijë, me mbikëqyrjen tuaj të detyrueshme për përmbajtjen e shikuar.
• Koha e nevojshme e gjumit shkon nga 10 në 13 orë, duke përfshirë gjumin e ditës dhe atë të natës dhe periudhat e zgjimit gjatë natës. Nuk duhet të shkurtoni kohën e gjumit të fëmijës sepse kjo mund të shoqërohet me çrregullime: çrregullim i rritjes, mbipeshë, çrregullim emocional, etj.

Aktiviteti fizik me intensitet të lehtë përfshin aktivitete me kosto energjie 1.5 deri 4.0 herë më shumë se shpenzimi i energjisë gjatë pushimit për fëmijën: larje, ecje e ngadaltë ose aktivitete të tjera të rastësishme; ato nuk rezultojnë në nxehtësinë e fëmijës.

Aktiviteti fizik me intensitet mesatar deri në intensitet të fuqishëm përfshin aktivitete që kërkojnë 4–7 herë më shumë shpenzim të energjisë sesa gjatë pushimit për fëmijën: ecje e shpejtë, çiklizëm, vrapim dhe lojëra me top, kërcim, not, vallëzim etj., gjatë të cilave fëmija nxehet dhe i përshpejtohet frymëmarrja