Udhëtimi i parë me foshnjën tuaj!

Nëse po udhëtoni për herë të parë me foshnjën, është e rëndësishme një plan dhe një organizim i mirë udhëtimi. Në mënyrë që foshnja juaj të jetë e sigurt, vendoseni atë në një ulëse për fëmijë në sediljen e pasme të makinës, që është e çertifikuar dhe e instaluar siç duhet, e përshtatshme për moshën e tij/saj dhe sigurohuni që foshnja të jetë e lidhur siç duhet çdo herë.

Kur foshnja është 2 muajshe dhe nuk ka probleme shëndetësore, ju mund të udhëtoni. Udhëtimi më i rehatshëm me një fëmijë është në makinë.

Fëmija duhet vendosur në një ulëse për fëmijë në sediljen e pasme në makinë dhe një prind duhet të qëndrojë me të në sediljen e pasme, si dhe të keni me vete një çantë ku të merrni pelena për ta ndërruar fëmijën, rroba, pelena të sheshta prej lecke, krem për foshnjat, fshirëse të lagura, një shishe uji, një batanije të hollë, lodra dhe ushqim për fëmijën në varësi të moshës së tij/saj.

Ndoshta nuk mund ta ndërroni foshnjën në tualet në zonat e pushimit, prandaj mbani gjithmonë me vete një rrobë që mund të shtrihet lehtësisht në sediljen e makinës për të ndryshuar pelenën e foshnjës.

Nëse nuk jeni duke ushqyer me gji foshnjën tuaj, duhet të sillni gjithçka që ju nevojitet për të përgatitur ushqimin me formulë. Është më mirë të udhëtoni herët në mëngjes ose vonë pasdite, nëse udhëtoni gjatë verës. Nëse jeni duke shkuar në një udhëtim të gjatë, ajri i kondicionuar në makinë është një domosdoshmëri. Instaloni mbrojtëset kundra diellit në dritaret e makinës.

Gjatë udhëtimit, bëni pushime të shpeshta (çdo 2 orë) për 30 minuta. Para pushimit (rreth 10 minuta), fikni ajrin e kondicionuar, pastaj hapni dritaret kur ndaloni për të shmangur "ndryshimin" e temperaturës.

Shpesh është e nevojshme që fëmija të zbavitet për të mos e shqetësuar personin që nget makinën; prandaj merrni me vete lodra të përshtatshme. Mos i jepni lodra të forta një fëmije në makinë, pasi mund ta dëmtojnë fëmijën kur frenoni.