Краснуха

Да сімптомаў краснухі адносяць гарачку, павелічэнне лімфатычных вузлоў і бледна-ружовы сып па ўсім целе. Асноўная рызыка для дзіцяці — заражэнне краснухай яго маці ў перыяд цяжарнасці, што выклікае сур’ёзныя пашкоджанні плода падчас развіцця ва ўлонні. Пры падазрэнні на развіццё гэтага захворвання ў вашага дзіцяці або верагоднасці вашага заражэння (магчымы кантакт з хворым краснухай) у перыяд цяжарнасці трэба неадкладна звярнуцца да ўрача. Лепшы спосаб прадухіліць узнікненне краснухі ў дзіцяці — своечасовая імунізацыя.

Аб краснусе

Краснуха — рэспіраторная інфекцыя, якая выклікаецца вірусам краснухі. Гэты вірус перадаецца паветрана-кропельным шляхам пры асабістым кантакце, кашлі або чханні.

Сімптомы краснухі

Заражэнне вірусам краснухі звычайна адбываецца за 14–21-ы дзень да з’яўлення якіх-небудзь сімптомаў.

Раннія праявы краснухі падобныя да прыкмет лёгкай прастуды. Яны могуць уключаць гарачку, боль у горле і павелічэнне лімфатычных вузлоў у вобласці шыі.

Праз 2–3 дні з’яўляецца сып на целе — бледна-ружовыя плямы, якія становяцца белымі пры націсканні на іх. Высыпанні спачатку з’яўляюцца на твары, затым распаўсюджваюцца на грудзі, жывот і спіну. Сып трымаецца 35 дзён, перш чым знікне.

Дзеці, якія захварэлі на краснуху, заразныя на працягу пяці дзён да з’яўлення сыпу і не менш чым чатырох дзён пасля гэтага.

Рызыка пры заражэнні краснухай

Звычайна краснуха ў дзяцей працякае ў лёгкай форме.

Самым сур’ёзным наступствам гэтага захворвання з’яўляецца шкода, якая можа быць нанесена плоду цяжарнай жанчыны. Калі невакцынаваная цяжарная жанчына заразіцца краснухай, у яе можа адбыцца выкідыш або яе дзіця можа памерці адразу пасля нараджэння. Акрамя таго, яна можа перадаць вірус свайму дзіцяці, якое развіваецца, з-за чаго ўзнікне рызыка з’яўлення ў яго сур’ёзных прыроджаных дэфектаў, такіх як:

пашкоджанні сардэчна-сасудзістай сістэмы;
страта слыху і зроку;
разумовая адсталасць;
пашкоджанне печані або селязёнкі.

Сур’ёзныя прыроджаныя парушэнні часцей сустракаюцца ў тых дзяцей, чые маці былі інфіцыраваны на ранніх тэрмінах цяжарнасці, асабліва ў першым трыместры. Гэтыя цяжкія прыроджаныя дэфекты вядомыя як сіндром прыроджанай краснухі.

Ці трэба звяртацца да ўрача з нагоды краснухі ў дзіцяці?

Так! Вам трэба звярнуцца па кансультацыю да педыятра, калі вы хвалюецеся, што ў вашага дзіцяці краснуха.

Дзяцей, якія захварэлі на краснуху, варта трымаць далей ад цяжарных жанчын. Калі вы цяжарная і думаеце, што заразіліся краснухай, звярніцеся да спецыяліста тэрапеўтычнага або акушэрска-гінекалагічнага аддзялення сваёй паліклінікі.

Лячэнне краснухі

Лекаў для лячэння краснухі не існуе, але ёсць спосабы палегчыць сімптомы ў дзіцяці. Гэта:

прымяненне парацэтамолу ў рэкамендаваных дозах з мэтай сімптаматычнага лячэння;
падахвочванне дзіцяці да спажывання большай колькасці вадкасці і адпачынку падчас хваробы.

Дзеці, хворыя на краснуху, не павінны наведваць школьныя, дашкольныя ўстановы і іншыя грамадскія месцы да таго часу, пакуль гэта не будзе дазволена лечачым урачом.

Прафілактыка краснухі

Лепшы спосаб пазбегнуць краснухі, а таксама знізіць рызыку заражэння цяжарных жанчын — своечасовая імунізацыя дзіцячага насельніцтва.

Вакцына супраць краснухі ўводзіцца двойчы ў складзе вакцыны АПК, якая абараняе дзіця яшчэ ад адру і эпідэмічнага паратыту.

Магчымая занепакоенасць, якая існуе сярод некаторых бацькоў, звязаная з падазрэннямі на тое, што вакцына АПК павышае рызыку расстройстваў аўтыстычнага спектра (РАС), неабгрунтаваная. Няма ніякіх навуковых доказаў таго, што вакцынацыя АПК звязана з развіццём РАС. Калі ў вас ёсць якія-небудзь асцярогі ці сумневы з нагоды вакцыны, варта абгаварыць гэта са сваім урачом.