Маці з інфекцыяй COVID-19: рэкамендацыі па грудным выкормліванні

Па наяўных на сённяшні дзень звестках вірус, які выклікае COVID-19, не знойдзены ў малаку ў маці з пацверджанай інфекцыяй або падазрэннем на яе, таксама няма доказаў таго, што вірус перадаецца пры грудным выкормліванні.

Даказана, што кармленне грудзьмі / кармленне грудным малаком зніжае смяротнасць нованароджаных, немаўлят і малых дзяцей і аказвае пажыццёвы ўплыў на імунітэт. Падчас эпідэмій і іншых стыхійных бедстваў гэта найважнейшы прыродны рэсурс для кармлення нованароджаных і немаўлят.

Маці, якая інфіцыравана COVID-19 і мае лёгкую клінічную карціну, рэкамендуецца працягваць даглядаць дзіця і карміць яго грудзьмі, выконваючы пры гэтым пэўныя гігіенічныя меры. Рэкамендуецца:

  • Праветрываць памяшканне на працягу 10 хвілін кожныя 2 гадзіны.
  • Рэгулярна чысціць і дэзінфіцыраваць паверхні, да якіх яна дакранаецца.
  • Пры доглядзе дзіцяці і кармленні грудзьмі трэба надзяваць чыстую маску, якая павінна закрываць нос і рот. Пасля яе надзявання неабходна мыць рукі. Маску трэба мяняць кожныя 2 гадзіны і адразу пасля намакання. Пры зняцці маскі нельга датыкацца да той часткі, якая прылягала да твару. Выкарыстаную маску нельга надзяваць паўторна, яе трэба выкінуць.
  • Перад кожным кантактам з дзіцем трэба мыць рукі вадой з мылам на працягу 20 секунд.
  • Няма неабходнасці мыць грудзі да і пасля кармлення імі. Дастаткова падтрымліваць гігіену цела, рэгулярна прымаючы душ і часта мяняючы начную кашулю. Калі пры кашлі макрота пападае на грудзі, іх неабходна памыць вадой з мылам.
  • Калі ў інфіцыраванай маці няма катаральных праяў і дзіця знаходзіцца ў тым жа пакоі, ложачак павінен размяшчацца на адлегласці 2 м ад ложка маці, а паміж імі варта паставіць перагародку.
  • Калі маці кашляе ці чхае, ёй пажадана не знаходзіцца ў адным пакоі з дзіцем, а ў памяшканні, дзе яно ёсць, насіць ахоўную маску.
  • Заражанай маці трэба кашляць ці чхаць у папяровую сурвэтку, пасля чаго неадкладна выкідваць яе ў смеццевае вядро з вечкам. Далей абавязкова мыццё рук вадой з мылам на працягу 20 секунд.

Калі маці не адчувае сябе дастаткова добра, каб карміць дзіця грудзьмі (нядужанне, катаральныя з'явы, павышэнне тэмпературы цела да 38,5 °C), ёй трэба аказаць дапамогу ў сцэджванні, каб забяспечыць харчаванне дзіцяці грудным малаком. Як толькі яе клінічны стан палепшыцца, яна можа працягваць карміць грудзьмі. Сцэджванне таксама патрабуе ад маці захавання пэўных гігіенічных мер:

  • Важна надзяваць чыстую маску, якая будзе закрываць нос і рот.
  • Рукі трэба мыць вадой з мылам на працягу 20 секунд перад кожным сеансам сцэджвання.

Пры сцэджванні малака трэба аддаць перавагу не ручному спосабу, а выкарыстанню вымытага і стэрылізаванага малакаадсоса: так верагоднасць заражэння малака будзе ніжэйшай.

У выпадку, калі ў маці цяжкі клінічны стан, абавязкі па доглядзе немаўляці павінен узяць на сябе здаровы член сям'і; дзіця варта карміць сумессю. Калі пасля выздараўлення маці захоча карміць грудзьмі, ёй трэба аказаць дапамогу ў падтрымцы лактацыі.