Распаўсюджаныя паводзіны ў дзяцей: плач

Немаўляты нараджаюцца са здольнасцю плакаць. Для дзіцяці плач — гэта асноўны спосаб зносін з людзьмі і дэманстрацыі таго, што яно галоднае, стамілася, адчувае боль, яму некамфортна, а таксама гэта сігнал, што яму востра патрэбны ласка, кампанія і адчуванне камфорту.

Характар плачу ў дзіцяці змяняецца па меры таго, як яно расце. У сярэднім немаўляты плачуць да трох гадзін у дзень, а адно з дзесяці немаўлят — нават даўжэй. Больш за ўсё яны плачуць ва ўзросце 6–8 тыдняў; па меры таго, як дзіця расце, яно, як правіла, плача ўсё менш. Немаўляты ва ўзросце да шасці месяцаў звычайна плачуць найбольш інтэнсіўна пасля абеду і бліжэй да вечара. Суцяшэннем можа служыць тое, што гэта звычайна спыняецца, калі дзіцяці спаўняецца пяць месяцаў. Калі дзіця крыху падрасце, яно будзе плакаць днём часцей, але менш працягла і інтэнсіўна і ў асноўным па прычыне таго, што хоча вам нешта паведаміць.

Што рабіць, калі дзіця плача

Перш за ўсё праверце: магчыма, дзіця галоднае, стамілася ці адчувае сябе некамфортна. У гэтым выпадку будзе лёгка адрэагаваць: трэба проста пакарміць, пакласці спаць ці памяняць падгузнік. Вось яшчэ некалькі варыянтаў таго, што можна зрабіць:

Акуратна пагушкайце дзіця. Ласкавыя дакрананні і знаходжанне ў бацькоў на руках могуць мець заспакаяльнае дзеянне.
Схадзіце на прагулку з дзіцем (калі вы не занадта стаміліся для гэтага).
Выкупайце дзіця або пяшчотна памасіруйце яго. Дакрананні і масаж супакойваюць, а таксама ўмацоўваюць сувязь паміж ім і вамі. Спытайце ў вашай патранажнай медсястры ці ўрача, як бяспечна рабіць масаж дзіцяці.
Ласкава паразмаўляйце з дзіцем, паспявайце яму, пагушкайце ці абдыміце яго, уключыўшы пры гэтым ціхую музыку. Часам шум і гукі такіх прыбораў, як фен ці пыласос, могуць супакоіць дзіця.
Паменшыце інтэнсіўнасць знешніх раздражняльнікаў, напрыклад, прыглушыце святло.

Плач дзіцяці часам моцна турбуе бацькоў, пры гэтым яны могуць нават адчуваць трывогу, злосць ці стрэс. Старайцеся хаця б ненадоўга пераключаць увагу: можна пагуляць, пачытаць кнігу, заняцца спортам або прыняць ванну. Калі дзіця плача, а вы адчуваеце, што больш не можаце гэтага выносіць, пакладзіце яго ў бяспечнае месца і ненадоўга выйдзіце з пакоя. Ніколі не трасіце дзіця — гэта можа прывесці да небяспечных траўм галаўнога мозга.

Звяртайцеся па дапамогу і адкрыта гаварыце пра свае пачуцці. Вы напэўна робіце ўсё, што ў вашых сілах, каб дзіця перастала плакаць; аднак калі немаўляты плачуць доўга і моцна, многія бацькі адчуваюць стомленасць і раздражненне. Таму важна звяртацца па кансультацыю і гаварыць пра тое, што вы перажываеце і як вы рэагуеце.