Рэжым кармлення і сну на працягу першага тыдня жыцця

У першыя дні і нават тыдні ў дзіцяці яшчэ няма наладжанага рэжыму сну і няспання. Нованароджанае дзіця спіць у сярэднім 18 гадзін у суткі, таму, за выключэннем часу на пераадзяванне і кармленне, перыяды няспання кароткія.

У большасці выпадкаў немаўлят трэба карміць кожныя 24 гадзіны, гэта значыць звычайна яны ядуць 8–12 разоў у суткі. Страўнік нованароджанага маленькі і не можа змясціць вялікую колькасць малака. Дзякуючы свайму складу грудное малако вельмі хутка пераварваецца — на працягу 90 хвілін, таму дзіця праз непрацяглы час зноў галоднае. Кожнае дзіця з самага нараджэння індывідуальнае; нават у немаўлят, як і ў дарослых, ёсць свае звычкі ў харчаванні. Некаторыя з іх смокчуць грудзі 6–8 разоў на дзень, іншыя ж любяць «перакусіць» часцей, таму ў іх 12–14 прыёмаў ежы ў суткі.

Большасць немаўлят самі прачынаюцца, каб паесці. Некаторыя з іх у першыя тыдні жыцця санлівыя і больш пасіўныя (асабліва неданошаныя дзеці, немаўляты з нізкай масай цела пры нараджэнні або тыя, якія перанеслі крытычныя станы). Такіх дзяцей варта падахвочваць да больш актыўнага смактання грудзей, важна практыкаваць кантакт «скура да скуры», таксама неабходна часцей вымяраць іх вагу.

Для наладжвання рэжыму кармлення і сну дзіцяці патрэбны час. З кожным днём немаўля ўсё больш прыстасоўваецца да навакольнага асяроддзя і рэагуе на яго, а бацькі вучацца распазнаваць патрэбы дзіцяці. Дзіця сігналізуе аб сваіх жаданнях, а вы спрабуеце высветліць, чаго менавіта яно хоча, прымяняючы на ​​практыцы ўсё, што даведаліся, пачулі або што самі лічыце патрэбным; і падчас такой «вучобы» паступова фарміруецца ўменне разумець патрэбы дзіцяці. Перыяд «знаёмства» можа быць няпростым.

У першыя тыдні пасля нараджэння дзіцяці трэба падумаць і пра сябе. Вам неабходна рэгулярна харчавацца, у вас павінна быць умераная фізічная нагрузка і сон падчас сну дзіцяці, што дазволіць вам папоўніць недахоп сну. Таксама вы можаце звярнуцца па дапамогу да сям’і і сяброў!

Каб забяспечыць і сабе, і дзіцяці спакой і адпачынак, адкладзіце святкаванне яго нараджэння, сустрэчу з сям’ёй і сябрамі. Каб акрыяць пасля родаў, прыстасавацца да рэжыму дзіцяці і наладзіць грудное выкормліванне, патрэбен хаця б месяц. Калі мама, тата і дзіця пачнуць дзейнічаць як зладжаная і дружная каманда, з’явіцца час для ўрачыстасцей і зносін.

Калі ў вас ёсць пытанні ці сумненні наконт груднога выкормлівання, звярніцеся да кансультантаў па грудным выкормліванні ці спецыялістаў арганізацыі аховы здароўя, якая мае статут «Бальніца, добразычлівая для дзіцяці». Вам акажуць прафесійную дапамогу і дадуць рэкамендацыі.