Rutina spavanja kod novorođenčeta

Spavanje novorođenčeta: osnove

Novorođenče većinu vremena provodi spavajući, „programirano“ je da spava u kratkim intervalima, po 2–3 sata između podoja, noću i danju.

U toku prvih šest mjeseci Vašoj bebi će biti potrebno da i noću budete uz nju, da je nahranite i smirite. Neke bebe nastave da se bude noću i nakon ovog perioda.

Rutine (odredjene aktivnosti koje se odvijaju istim redosljedom u isto vrijeme) spavanja mogu biti različite, kao što su različite i bebe i roditelji. Vaš pristup zavisiće od raznih izbora koje pravite, počev od onog gdje će Vaša beba spavati – u svom krevecu ili u kolijevci pored Vašeg kreveta.   

Neki roditelji ne žele da rade na uspostavljanju rutine spavanja, već prepuštaju bebi da sama odredi kad će i koliko spavati. Drugi smatraju da je jednostavna i fleksibilna rutina spavanja dobra za bebu, ali i za njih kao roditelje, jer im pomaže da održavaju kontrolu.

U svakom slučaju, ovo nije vrijeme za krute, nefleksibilne planove i mjere. Možda ćete otkriti da se Vaša beba ne uklapa ni u najbolje osmišljene planove i da je jednostavno treba pustiti da sama ustanovljava svoj ritam! U prvih nekoliko mjeseci života Vaše bebe, najbolje je da idete polako – da se upoznajete s bebom i u tom procesu donosite odluke o tome šta je najbolje za nju i za Vas.  

Hranjenje, igranje i spavanje: jednostavna rutina spavanja kod novorođenčeta

Važno je da budete fleksibilni u pogledu vremena spavanja i hranjenja Vašeg novorođenčeta. Ipak, mnogi stručnjaci za zdravlje odojčadi vjeruju da može pomoći, i Vama i bebi, ako se osnovne bebine aktivnosti – hranjenje, igranje i spavanje – odvijaju svakoga dana sličnim redosljedom. 

Kad se beba probudi, pokušajte da uvijek uradite sljedeće:

• Ponudite joj da jede.
• Promijenite joj pelenu.
• Pričajte malo s bebom, igrajte se s njom.
• Stavite je ponovo da spava.

Noću je možda najbolje da izostavite igranje i da se usredsredite samo na to da umirite bebu i ponovo je smjestite da spava.

Kad je riječ o malim bebama, vrijeme za igru može biti samo tiho maženje ili blaga gimnastika, kad se beba proteže i nogicama lupka po prekrivaču. Možda ćete otkriti da je Vašoj bebi dovoljno 10–20 minuta igre. Male bebe se brzo umore i za njih je sat ili sat i po vremena u budnom stanju mnogo. Ipak, ima dosta beba koje se rado igraju i duže.

Pratite ponašanje i govor tijela Vaše bebe kako biste prepoznali znake umora i otkrili kad je vrijeme da prestanete s igrom.  Ako ne prepoznate na vrijeme prve znake umora i pustite bebu da nastavi, ona može postati uznemirena, nezadovoljna, plačljiva, a ukoliko se to ponavlja moglo bi preći u njen obrazac ponašanja.  

Važno je da pratite bebine znakove i zahtjeve u pogledu hranjenja, igre i spavanja, ali i da počnete da uspostavljate određenu rutinu i približno isti dnevni redosljed u obavljanju ovih aktivnosti. 

Spavanje tokom dana

Ako bebu držite budnu tokom dana, to joj neće pomoći da bolje spava noću. Dnevno spavanje je takođe važno, ali nemojte da beba tokom dana spava duže od četiri sata odjednom.

Nakon spavanja, beba je gladna i treba je nahraniti. U prvom mjesecu beba ne razlikuje dan od noći, pa je polako treba učiti da je noć za spavanje, a dan za dnevnu dremku.

Hranjenje i spavanje

Novorođenče je po pravilu potrebno hraniti svaka 2–4 sata, poštujući pravilo – „na bebin zahtjev“. Danju je buditi poslije 4 sata, a noću je ostaviti dok se sama ne probudi. Vaša beba će bolje spavati poslije dobrog obroka.

Umirivanje 

Novorođenčetu je potrebna Vaša pomoć kad se uznemiri. Ako ste nahranili bebu (u posljednja dva sata), probajte da je mazite (po ledjima, tabanima) i utiješite uz tihu priču ili pjesmicu/muziku. Takođe, možete pokušati da je dodatno nahranite ukoliko prepoznate i takve signale. To će joj pomoći da zaspi. Od pomoći može biti i da je raspovijete i stavite sebi ili tati na grudi – dodir koža na kožu i pokrijete se zajedno sa njom – tako se često smiri uz otkucaje Vašeg srca.

Treba imati u vidu da bebu mogu mučiti i gasovi poslije hranjenja, pa da oni izazivaju uznemirenost, zato takvo stanje spriječite podizanjem bebe poslije hranjenja i držanjem (ako treba i duže) da podrigne (nekada i po više puta). Ako je pak na mliječnoj formuli, poslije obroka je ponudite prokuvanom nezasladjenom vodom – da ne bi žedj bila uzrok njene uznemirenosti. Ako je beba uznemirena provjerite i da nije pretopljena ili pak nedovoljno obučena.