Мокрење во кревет

Причини за мокрење во кревет

Мокрењето во кревет се случува кога децата не се будат во текот на ноќта кога треба да мократ. Децата не мократ во кревет намерно.

Постојат неколку различни причини за мокрење во кревет.

Некои деца мократ во кревет затоа што спијат многу длабоко, некои од нив произведуваат поголеми количини на мокрача во текот на ноќта, а некои деца имаат мали мочни меурчиња, што значи дека е поголема веројатноста да го мократ во кревет навечер.

Мокрењето во кревет често е наследно. Ако вие сте мокреле во кревет како дете, многу е веројатно дека вашите сопствени деца ќе мократ исто така. Ова не значи дека вие сте виновни ако вашето дете мокри во кревет.

Мокрењето во кревет може да биде фрустрирачко и загрижувачко за вас на моменти, па затоа е добро да знаете дека постојат ефикасни третмани за мокрење во кревет што можат да му помогнат на вашето дете.

Симптоми на мокрење во кревет

Мокрењето во кревет се случува навечер. Некои деца мократ во кревет секоја вечер. Други деца мократ само неколку пати неделно, еднаш неделно или еднаш месечно.

Дневно мокрење е случајно мокрење во текот на денот, додека вашето дете е будно. Тоа е многу поретко од мокрењето во кревет. Дневното мокрење почесто е предизвикано од медицинска состојба или стрес. Зборувајте со вашиот лекар ако вашето дете се помочува во текот на денот.

Кога да се обратите кај вашиот лекар за мокрење во кревет

Ако сте загрижени за мокрењето во кревет на вашето дете или ако тоа предизвикува проблеми за детето и за семејството, може да го посетите вашиот лекар за совет во врска со третманот и менаџирање на мокрењето.

На пример, би било добра идеја да го посетите докторот ако вашето дете сè уште редовно го мокри креветот на седум години и:

• сте загрижени за тоа како вашето дете ќе се справи со преспивање кај другарче или за време на училишните кампувања
• мокрењето во кревет почнува да го вознемирува или загрижува вашето дете.

Многу е важно да го посетите вашиот лекар ако вашето дете започнало повторно со мокрење во кревет откако веќе било „суво“ ноќе бидејќи ова може да бидат првите симптоми на сериозна состојба како што се инфекција или дијабетес или може да биде поврзано со емоционален стрес како раѓање на нов брат или сестра.

Третман за мокрење во кревет

Подигање и будење:

Подигнување е кога ќе го подигнете вашето дете од кревет додека тоа сè уште спие и ќе го однесете во тоалетот за да се измоча. Будење е кога ќе го разбудите вашето дете и ќе го однесете во тоалетот да се измоча. Можете да го направите ова пред самите вие да легнете, или во одредено време во текот на ноќта.

Подигањето и будењето можат да помогнат да се запре мокрењето на кревет на краток рок, но тоа обично не престанува целосно. Тоа не е долгорочно решение.

Пиење течности:

Важно е вашето дете редовно да пие вода во текот на денот за да остане хидрирано, дури и ако мокри во кревет.

Ако вашето дете пие многу вода во текот на денот, можеби ќе може да избегне пиење премногу течност пред спиење. Пиење премногу течност пред спиење може да ја зголеми потребата на вашето дете да мокри во текот на ноќта и да доведе до мокрење во кревет. Ако вашето дете е жедно пред спиење, тоа може да биде знак дека не испило доволно течности во тек на денот.

Најдобро е за вашето дете да избегнува какви било пијалоци со кофеин навечер - на пример, кока-кола, чај, кафе или топло чоколадо. Овие пијалоци ја зголемуваат количината на мокрача кај вашето дете.

Аларми за мокрење во кревет:

Аларм за мокрење во кревет е уред што прави бучава и го буди вашето дете кога ќе се измокри во кревет.

Алармите за мокрење во кревет функционираат со обука на вашето дете да се разбуди кога ќе почне да мокри во кревет. Тие му помагаат на вашето дете да започне да препознава кога мочниот меур е полн и да научи да издржи или да се разбуди и да оди во тоалет. Идејата е дека кога ќе се вклучи алармот, вашето дете се буди пред целосно да го испразни мочниот меур.

Ако одлучите да користите аларм за мокрење во кревет, може да биде добра идеја да спиете во собата на вашето дете првата недела или две, за да му помогнете брзо да стане и да дојде до тоалетот. Можеби ќе треба да го утешите ако е вознемирено или збунето од звукот на алармот.

Вашиот лекар ќе може да ви каже дали алармот за мокрење во кревет е вистинската опција за вашето дете и семејство.