|
Prindërit këshillohen të flasin me foshnjën, të lexojnë tregime, të këndojnë, të emërtojnë çdo gjë që bëjnë ose që bën, sheh ose përjeton fëmija, që nga dita e parë e jetës së fëmijës së tyre. Sa më shumë që prindërit i përsëritin fjalët dhe i lidhin me veprimet dhe gjërat në mjedisin dhe përvojat e foshnjës, aq më e madhe është aftësia e foshnjës për të mësuar. Kur mundësi të tilla janë të pakta, gjegjësisht të folurit dhe fjalët në mjedisin e foshnjës janë të pakta, ndodh e kundërta - regjistrimet në tru zbehen dhe aftësia për të mësuar dobësohet.
Ja çfarë mund të bëni për t’i siguruar “ushqim gjuhësor” foshnjës suaj:
- mbani mend se të folurit është rrugë e dy anshme - kushtoni vëmendje se sa shpesh e inkurajoni foshnjën tuaj të flasë me ju, flisni me foshnjën tuaj sa më shpesh që të jetë e mundur, ndiqni atë që ai/ajo bën dhe emërtoni atë, përgjigjuni kur ai/ajo ju drejtohet ose tregon interes për diçka
- sa herë që jeni në kontakt me foshnjën, kur e përkundeni, përkëdheleni, ndërroni pelenat, lani, luani me të - përpiquni të përdorni një ton të ngrohtë zëri kur i drejtoheni foshnjës. Respektoni ritmin e foshnjës: flitni ngadalë dhe jepini kohë foshnjës të përgjigjet. Shikoje foshnjën në sy dhe përpiquni të mbani kontakt me sytë. Tërhiqeni vëmendjen e fëmijës duke ndryshuar tonin ose ritmin e të folurit.
- ndiqni foshnjën dhe reagimet e tij/saj gjatë bisedës suaj: kur vini re se foshnja nuk është më e përfshirë aktivisht, ndryshoni llojin e komunikimit. Kur foshnja shikon larg, jini të durueshëm dhe jepni atij/asaj një shans për të bërë një pushim dhe “t’i ribashkohet” bisedës. Kur ai/ajo të shikon përsëri, përshëndete me një fytyrë të qeshur dhe me fjalë miratimi. Kur vëreni se foshnja nuk kënaqet më me shkëmbimin, ose ka pasur mjaft biseda - jepini kohë atij/asaj për të pushuar më gjatë dhe një mundësi për ta ndryshuar aktivitetin.
Kur flet me foshnjën, fike televizorin, celularin dhe pajisjet e ngjashme. Shkenca sugjeron se të folurit që vetëm e dëgjon foshnja nuk është mjaft nxitëse.
Nga ana tjetër, mbani parasysh se foshnja është më e gatshme për eksplorim dhe aktivitet kur ai/ajo e ka mbështetjen tuaj dhe vëmendjen e pandashme. Prandaj, le të jenë bisedat tuaja situata që e forcojnë lidhjen mes jush.
|
