Агар Шумо дар гирду атроф муносибати бераҳмона ё беэътиноӣ нисбати кӯдаконро мушоҳида кунед, чӣ кор карда метавонед?

Агар Шумо яке аз аломатҳои зеринро дар кӯдак дар ҷомеаи худ мушоҳида кунед, Шумо метавонед гумон кунед, ки ҳодисаи муносибати бераҳмона ё қонеъ накардани эҳтиёҷоти кӯдак ҷой дорад:

• нобоварӣ аз ҷониби кӯдак ё эҳтиёткории шадиди ӯ нисбат ба ҳамаи калонсолон;
• рафтори ниҳоят хашмгин ва ё баръакс итоаткорӣ, ошуфтагӣ ё изтироби кӯдак;
• паст будани худбаҳодиҳӣ, канораҷӯӣ кардан ё душворӣ дар барқарор кардани муносибат бо калонсолон ё дигар кӯдакон;
• аз ҳад зиёд итоаткорӣ ва ҳалимии кӯдак ба хотири хушнудии калонсолон;
• мушкилот бо ҷалбшавии диққатнокӣ;
• аз ҳад зиёд ҷунбонидани бадан, зуд-зуд ғурунг-ғурунг кардан, доимо макидан ё газидан (ангуштон, лаб, мӯй, либос ва ғ.);
• дидани хобҳои даҳшатовар, мушкилоти хоб рафтан;
• кӯдак зуз-зуд ба ягон ҳодисаи нохуш дучор мегардад ё дар бадани ӯ доғҳои кабуд ё ҷароҳати пайдоишаш номаълум дида мешавад;
• баёни номуайян оид ба пайдоиши ҷароҳатҳои кўдак, ки ба намуди осеб мувофиқат намекунад;
• хоҳиш надоштани кӯдак барои ба хона рафтан;
• истифодаи номатлуби истилоҳоти ҷинсӣ ё рафтори шаҳвонӣ, ки барои кӯдаки ин синну сол хос нест. 

Шумо чӣ кор карда метавонед, агар гумон кунед, ки кӯдаке дар ҷомеаи шумо ба зӯроварӣ дучор гардидааст ё эҳтиёҷоти ӯ қонеъ карда намешавад:

• Ба ҳама гуна нишонаҳои зӯроварии эҳтимолӣ ё қонеъ нашудани эҳтиёҷоти кӯдак аҳамият диҳед.
• Ба кӯдак пешниҳод кунед, ки ҳар вақт хоҳад бо Шумо сӯҳбат кунад. Сӯҳбатро мулоимона баред, бидуни таъна ё вокуниши эҳсосии аз ҳад зиёд.
• Агар кӯдак ғамгин ё бемор ба назар расад, ғамхорӣ кунед, зеро ин метавонад ӯро ташвиқ кунад, ки ташвишу изтироби худро ба Шумо нақл кунад.
• Кӯдакро маҷбур накунед, ки ба саволҳои Шумо ҷавоб диҳад ва "суханро дар даҳони ӯ наандозед".
• Ба мақомоти маҳаллии ҳифзи ҳуқуқи кӯдак, маркази хизматрасонии иҷтимоӣ ба аҳолӣ ё милитсия муроҷиат кунед. Онҳо чораҳои муҳофизатӣ меандешанд ва ба Шумо дар бораи чӣ кор кардан маслиҳат медиҳанд. Агар Шумо дар бораи бехатарии худ нигарон бошед, Шумо метавонед аризаи беимзо диҳед.
• Худро эҳтиёт кунед – ин ҳолат метавонад Шуморо хеле ташвиш диҳад. Агар ба Шумо лозим ояд, ки бо касе дар бораи эҳсосоти худ сӯҳбат кунед, бо равоншинос ё мутахассисон аз маркази хизматрасонии иҷтимоӣ тамос гиред.