Emizishdan oldin va keyin koʻkrak parvarishi

Chaqaloq onaning tabiiy hidini juda yaxshi koʻradi; bu hid unga koʻkrakni topishga, uni yanada osonroq va faolroq soʻrishga yordam beradi. Laktatsiya (sut ajralishi) davrida kuchli hidli vannalar va tana koʻpiklarini ishlatish tavsiya etilmaydi, ayniqsa, koʻkrak sohasiga.

Butun tana gigiyenasiga qanday rioya qilinsa, koʻkrak gigiyenasiga ham shunday rioya qilinadi, yaʼni kuniga bir marta neytral sovun bilan dush qabul qilish kerak. Koʻkrakni, xususan, soʻrgʻichlarni emizishdan oldin yuvish mumkin emas. Emizishdan oldin qoʻllaringizni iliq suv va sovun bilan yaxshilab yuving, koʻkraklardan bir necha tomchi sut sogʻib, soʻrgʻichlar va uning atrofiga surting, shunda chaqaloq sutning hidi va taʼmini his qiladi.

Emizishdan oldin muammolar yuzaga kelsa – koʻkrak ogʻir, shishgan va sut bilan toʻla boʻlsa, emizishdan oldin iliq kompresslar qoʻyish va koʻkrak massajini bajarish tavsiya etiladi, bu chaqaloqqa koʻkrakni soʻrishni osonlashtiradi. Koʻkrak emizishdan keyin ham toʻla boʻlsa, sutni sogʻib tashlash kerak. Emizishdan soʻng bir necha tomchi sutni siqib, koʻkrak va areolalarga yana surting, ularni ochiq havoda quriting. Emizish / sogʻishdan keyin sovuq kompresslarni qoʻllang (taxminan 15 daqiqa), kompress ogʻriqni va sut kelishini kamaytiradi. Agar emizish paytida koʻkrak terisi shikastlangan boʻlsa, u yerdan qon oqsa, shu koʻkrak bilan 1–2 kun emizmang. Bu vaqt ichida koʻkrakni muntazam ravishda har 2–3 soatda qoʻl bilan sogʻib turing. Sogʻilgan sutni choyqoshiq, chashka yoki shpris bilan chaqaloqqa bering. Bundan tashqari, soʻrgʻichlarga pastroq allergiya chaqiruvchi moslashtirilgan lanolinni ham qoʻllashingiz mumkin. Baʼzan silikon qalqonlar va soʻrgʻich qalqonlari ham yordam berishi mumkin.

Koʻkrak bilan emizish ogʻriqli boʻlmasligi kerak.