Yangi tugʻilgan chaqaloqlar uchun oʻyinchoqlar: ikkinchi va uchinchi uchoylik
Bu yoshda bolalar koʻproq qoʻllab-quvvatlash, maqtov, chegaralarni izlaydi. Ota-ona bolaning feʼl-atvorini xuddi bola ota-onaning feʼl-atvorini shakllantiradigan darajada shakllantiradi; oʻzaro almashinuv, oʻzaro taʼsir va hissiy aloqa orqali ular har kuni birgalikda oʻsib, rivojlanib boradi. Oʻyin – bolalarning taʼlim olish usuli. Barcha kundalik ishlar oʻynash uchun imkoniyatdir: ovqatlanish, kiyinish, yechinish, tagliklarni almashtirish, paypoqlarni yechish, qoshiqni ushlash va qoʻllarni ovqat idishlarga solish, choʻmilish...
Har kunlik kun tartibi bolaga qoʻllarini yanada jadal ishlatish imkoniyatini beradi. Buning uchun har qanday imkoniyatdan foydalaning, masalan:
- turli materiallar va ularning tuzilishi bilan tanishish, ularga tegish;
- krem idishlari yoki salfetka paketlarini, qopqoqlarni ochish, qogʻozxaltalardan tagliklarni olib tashlash;
- tortmalarni, shkaflarni ochish va yopish, ichidagi narsalarni chiqarib tashlash;
- stakan, suzgich, qoshiq, qopqoqlarni paypaslash, tirnash, taqillatish, agʻdarish, ushlash.
Bu yoshda “oʻyinchoqlar”, yaʼni ota-onalar kunda foydalanadigan predmetlar tadqiqotda va faoliyatga taqlid qilishda bola uchun haqiqiy sinovdir. Bolalar burilishni, aylanishni, harakat qilishni, predmetlarni tortishni, koʻrsatkich barmogʻini teshiklarga tiqishni, taqillatishni, uchishni, narsalarni irgʻitishni va ogʻziga solishni yaxshi koʻradi. Har bir oʻyinchoq batafsil “tekshiruv”dan oʻtadi. Bolalarga quyidagilar yoqadi:
- turli funksiyalarga ega bloklar (bosish, ochish, koʻchirish, aylanadigan qismlar);
- musiqiy oʻyinchoqlar: barabanlar, shaqildoqlar, pianinolar;
- turli oʻlcham, rang, shakl va tuzilishga ega pufaklar;
- ular tortishi mumkin boʻlgan, biriktirilgan iplari bor oʻyinchoqlar;
- tugmachalari bosilganda ovoz yoki yorugʻlik signallari chiqaradigan oʻyinchoqlar;
- kitoblar;
- shakllarni saralash uchun oʻyinchoqlar (ular oldin yumaloq predmetlarni, keyin boshqa shakllarni ajratadi);
- bir-birining ichiga solish mumkin boʻlgan bir necha xil oʻlchamdagi qutilar: eng kattasidan eng kichigigacha.
Bolaning xavfsizligi har doim birinchi oʻrinda turadi, barcha oʻyinchoqlar xavfsizlik sertifikatiga ega boʻlishi kerak. Ularda oʻtkir qirralar boʻlmasligi, oson yirtiladigan kichkina qismlarga ega sinadigan plastmassadan yasalgan boʻlishi zarur, chunki bolalar ularni ogʻziga solib koʻradi va / yoki irgʻitadi, bu esa jarohatga olib kelishi mumkin.
Yana bir bor eslatma: bu yoshdagi bola uchun eng muhim oʻyinchoq – siz bilan birga kundalik hayotda va mashgʻulotlarda, oʻzaro aloqada kulgi, taqlid, mehr ulashish, oʻynash bilan oʻtkaziladigan maroqli vaqt.
