Nënat dhe baballarët e rinj: zgjedhje të shëndetshme të jetesës

Ushqimi dhe pirja e shëndetshme në ditët e para

Kujdesi për fëmijë të ri kërkon shumë kohë dhe energji.

Kjo do të thotë që ju ndoshta do të keni më pak kohë për të bërë pazar dhe për përgatitjen dhe gatimin e ushqimeve dhe vakteve. Ushqimi i mirë ju ndihmon për ta ruajtur lart nivelin tuaj të energjisë.

Për shëndet të mirë, duhet të hani një larmi të madhe ushqimesh çdo ditë nga pesë grupe kryesore ushqimore:

• perime - 6 racione në ditë për burrat dhe 5 racione në ditë për gratë
• fruta - 2 racione në ditë për burra dhe gra
• ushqime nga drithërat - 6 racione në ditë për burra dhe gra
• proteina - 3 racione në ditë për burrat dhe 2½ racione në ditë për gratë
• produkte qumështore me yndyrë të reduktuar - 2½ racione në ditë për burra dhe gra.

Gjithashtu është e rëndësishme të pini shumë ujë - tetë gota në ditë është sasia e rekomanduar. Është në rregull që ndonjëherë të pini lëng, lëng të dendur ose një pije të gazuar, por ato përmbajnë shumë sheqer, kështu që uji është zgjedhja më e shëndetshme.

Nëse jeni duke ushqyer fëmijën me gji, trupi juaj ka nevojë për lëndë ushqyese shtesë, të cilat mund t’i merrni nga një dietë e shëndetshme e ushqyerjes me gji.

Këshilla për ushqimin e shëndetshëm për prindërit e rinj

Këtu janë dhënë disa këshilla për opsionet e ushqimit të shpejtë, të lehtë dhe të shëndetshëm:

• Mbani perimet e lara dhe të copëtuara paraprakisht në frigorifer.
• Përgatitni ushqimet me shumicë dhe ngrini ato - për shembull tavat dhe supat.
• Përdorni perime të ngrira kur nuk keni kohë për të përgatitur perime të freskëta.
• Mbani shportën tuaj të frutave plot.
• Mbani jogurt, arra dhe copë të prera të perimeve, të dobishëm për ushqime të shëndetshme gjatë ditës.
• Bëni ushqime që mund të hahen të nxehta ose të ftohta. Ju gjithashtu mund t’i paketoni ato në enë për t’i marrë jashtë shtëpisë.
• Nëse është e mundur, blini në internet dhe përdorni shërbimet e shpërndarjes së ushqimeve.
• Pranoni ofertat e ushqimit nga miqtë dhe familja.

Aktiviteti fizik për prindërit e rinj

Edhe pse mund të ndiheni të lodhur dhe të dëshironi të pushoni sa të keni mundësi, stërvitja në fakt mund t’i rrisë nivelet tuaja të energjisë dhe t’ju bëjë të ndiheni më mirë. Lëvizja është shumë me rëndësi - 30 minuta ose më shumë në ditë.

Mund të jetë e vështirë të gjesh kohë për ta përshtatur këtë, por mund të përpiqesh ta bësh atë pjesë të aktiviteteve të përditshme. Për shembull, shtyrja e karrocës së fëmijës suaj në dyqane për të marrë disa gjëra për darkë ju largon nga shtëpia dhe ju mban gjithashtu aktiv.

Nuk keni nevojë të bashkoheni në një palestër për të ushtruar. Mësoni disa ushtrime që mund t’i bëni nga shtëpia ose të bëni një shëtitje ose të vraponi nga shtëpia. Atëherë nuk do të duhet të shqetësoheni për kohën e udhëtimit, përfshirë edhe kohën e shkuarjes në palestër.

Disa gra shqetësohen për humbjen e peshës që e kanë fituar gjatë shtatzënisë. Është e rëndësishme t’i ndani trupit tuaj kohë për t’u shëruar pasi të lindë fëmija juaj. Ushqimi i shëndetshëm dhe ushtrimet e lehta e krijojnë një qasje të arsyeshme.

Alkooli, pirja e duhanit dhe mjekimi

Kujdesuni për foshnjën tuaj në mënyrë të sigurt
Kontrolloni me mjekun ose farmacistin tuaj nëse ndonjë ilaç që merrni ju ose partneri juaj - përfshirë pijet ose tabletat bimore - kanë efekte anësore që mund ta bëjnë të vështirë të kujdeseni për fëmijën tuaj. Kjo mund të përfshijë çdo gjë që shkakton përgjumje, ndikon në ekuilibrin tuaj ose ndikon në reflekset tuaja - për shembull, kur drejtoni makinën.

Tani që jeni duke u kujdesur për një të porsalindur, do t’ju duhet të planifikoni se kush do të kujdeset për foshnjën nëse jeni duke pirë alkool ose duke marrë ilaçe që mund t’ju bëjnë të përgjumur ose të ndikojnë në ekuilibrin tuaj.

Alkooli dhe pirja e duhanit
Jo më shumë se dy pije standarde alkoolike për çdo ditë është një nivel i shëndetshëm.

Pirja e duhanit e vë fëmijën tuaj në rrezik më të lartë të vdekjes së papritur, siç është vdekja e papritur në foshnjëri (SUDI) duke përfshirë sindromën e vdekjes së papritur të foshnjave (SIDS) dhe aksidentet fatale të gjumit. Më së miri është që ju dhe fëmija juaj të jeni në një mjedis pa tym.

Kafeina mund të ndikojë në atë se sa mirë flini, prandaj përpiquni të mos e konsumoni vonë gjatë ditës.

Ajo që hani, pini apo duhani që e pini kalon përmes qumështit tuaj të gjirit tek fëmija juaj dhe mund të ndikojë në zhvillimin e trurit të foshnjës. Pra, nëse jeni duke ushqyer me gji nuk duhet të pini alkool, duhan ose të përdorni drogë.