Shpërqendrimi: mjet për menaxhimin e sjelljes

Përdorimi i shpërqendrimit si një mjet i menaxhimit të sjelljes

Shpërqendrimi është një strategji e thjeshtë që është e mirë për situata ku sjellja mund të jetë problem. Për shembull, kjo mund të jetë kur fëmijët:

• sillen me impulsivitet.
• kanë qëndruar ulur për një kohë të gjatë.
• kanë probleme me ndarjen e gjërave me të tjerët ose respektimin e radhës.

Theksimi i diçkaje interesante, fillimi i një loje të thjeshtë, përdorimi i shprehjeve faciale - me siguri ju kanë ndihmuar për të shpërqendruar fëmijën tuaj.

Shpërqendrimi zakonisht funksionon. Pra, është një mundësi e shkëlqyer për të menaxhuar sjelljen e fëmijës tuaj në shumë situata.

Disa këshilla rreth shpërqendrimit!

Këtu janë dhënë disa këshilla rreth shpërqendrimit, që zakonisht funksionojnë për fëmijët e të gjitha moshave:

• Jepuni fëmijëve diçka tjetër për të bërë. Prezantoni një aktivitet të ri, lodër ose lojë, ose madje tregojuni fëmijëve diçka të re që mund të bëjnë me lodrën që ata tashmë kanë.
• Ndryshoni vendin e fëmijës. Vendosini fëmijët aty ku mund të shohin gjëra të ndryshme, ose zhvendosini në një vend të ri brenda ose jashtë.
• Mendoni paraprakisht për aktivitete argëtuese. Mund të jetë aq e thjeshtë sa të planifikoni ndonjë lojë jashtë kur e shihni që fëmijët po mërziten brenda.
• Këndoni disa këngë ose vjersha së bashku. Kjo mund të jetë e dobishme kur nuk mund të ndaloni atë që po bëni, si për shembull kur jeni duke gatuar apo duke ngarë makinën.
• Nëse jeni jashtë, merrni disa lodra zbavitëse ose libra që mund t’i nxirrni kur keni nevojë për to.
• Sidomos kur fëmijët rriten, ndihmojini ata të kenë idetë e tyre për atë që mund t’i tërheqë ata: “Ne nuk mund të ikim në park edhe një orë tjetër. Çfarë mund të bësh në shtëpi që do të ishte argëtuese, tani?”

Shpërqendrimi mund të funksionojë edhe për fëmijët më të mëdhenj. Këtu janë dhënë disa ide:

• Ndryshoni temën e bisedës.
• Sugjeroni një lojë ose aktivitet të thjeshtë. Për shembull, sugjeroni fëmijëve tuaj të provojnë lojëra me puzzle ose lojën Uno, nëse thonë se nuk kanë asgjë për të bërë.
• Sugjeroni një pushim kur gjërat nuk shkojnë mirë. Për shembull, ju mund të thoni, “Më duket se ndihesh i/e frustruar me vizatimin tënd. Si mendon të bësh një xhiro me biçikletë?”

Nëse ndjeni se fëmija juaj është i/e mërzitur dhe ka nevojë për shpërqendrim, pse të mos e inkurajoni fëmijën tuaj t’i shpalosë idetë e veta? Shfrytëzimi maksimal i ndjesive të mërzisë mund të jetë një mënyrë e shkëlqyer për krijimtarinë e tij/saj dhe aftësitë e zgjidhjes së problemeve.

Kur nuk duhet ta përdorni teknikën e shpërqendrimit!?

Shpërqendrimi funksionon më mirë kur shihni se fëmija juaj mund të bëjë diçka të gabuar ose ka nisur që të mërzitet.

Shpërqendrimi nuk do të ndihmojë nëse fëmija juaj:

• ka lënduar dikë.
• ka një inat.
• është shume i/e mërzitur

Në situata si këto, është më mirë të merreni drejtpërdrejtë me sjelljen.

Për shembull, nëse fëmija juaj ka lënduar një fëmijë tjetër, mund të jetë joshëse të shpërqendroni të dy fëmijët me lodra ose aktivitete. Por kjo nuk e ndihmon fëmijën tuaj të kuptojë se nuk është në rregull t’i lëndosh njerëzit e tjerë. Mund të jetë më mirë të përdorni strategjinë e pushimit, për aq kohë sa fëmija juaj është mjaft i rritur për ta kuptuar këtë pasojë.

Gjithashtu, përpjekja për ta shpërqendruar fëmijën tuaj kur ai/ajo është i/e zemëruar mund të dërgojë mesazhin se ndjenjat e tij/saj të forta nuk janë të rëndësishme. Është më mirë ta trajtosh zemërimin duke pranuar ndjenjat e fëmijës tënd.

Është e lehtë të sugjerosh fëmijën që të kalojë kohë para ekranit si një mënyrë e shpërqendrimit. Nëse e bëni këtë, duhet të jeni të qartë për atë që po e lejoni fëmijën tuaj të bëjë. Për shembull, jini specifikë me cilat aplikacione mund të luajë ose çfarë shfaqje televizive mund të shikojë dhe për sa kohë.