Гепатыт А

Гепатыт А

Гепатыт А — гэта запаленчае захворванне печані, якое выклікаецца вірусам гепатыту А (ВГА).

Заражэнне адбываецца фекальна-аральным шляхам. Вірус гепатыту А распаўсюджваецца, калі дзеці ці дарослыя кантактуюць з прадметамі, ежай або вадой, забруджанымі калам інфіцыраванага чалавека.

Гепатыт А распаўсюджаны ў менш развітых краінах, асабліва ў тых месцах, дзе адсутнічаюць якасныя сістэмы каналізацыі. Памятайце, што вы падвяргаецеся асаблівай рызыцы, калі пражываеце ў такіх месцах або падарожнічаеце па іх.

Сімптомы гепатыту А

Вірус гепатыту А можа знаходзіцца ў целе чалавека да 28 дзён без праяўлення якіх-небудзь сімптомаў — гэты час называецца інкубацыйным перыядам. Такая яго працягласць ускладняе дакладнае вызначэнне, калі і дзе адбылося заражэнне.

У дзяцей з гепатытам А сімптомы звычайна больш лёгкія, чым у дарослых. Да таго ж у большасці дзяцей, асабліва ў зусім малых, сімптомаў нямнога. Магчыма як поўная адсутнасць відавочных на першы погляд прыкмет гепатыту А, так і выразная сімптаматыка захворвання, якая патрабуе шпіталізацыі, але такія выпадкі рэдкія.

З’яўленне сімптомаў гепатыту А можа быць раптоўным. Варта звярнуць увагу на агульныя прыкметы — стамляльнасць, гарачку, млоснасць, адсутнасць апетыту, рвоту і дыярэю.

Пазней у дзіцяці можа з’явіцца моцны сверб скуры, жывот можа крыху напухнуць і балець, асабліва ў правай верхняй частцы, дзе знаходзіцца печань. Праз некалькі дзён могуць дабавіцца іншыя сімптомы: напрыклад, мача ў дзіцяці стане цёмна-жоўтага або карычневага колеру, а яго скура і вочы набудуць жаўтаватае адценне — такая праява называецца «жаўтухай».

Поўнае выздараўленне пры гепатыце А звычайна адбываецца праз тыдзень ці два, але ў некаторых выпадках гэты працэс можа заняць больш часу. Інфекцыя гепатыту А звычайна працягваецца не так доўга, як інфекцыя гепатыту В або гепатыту С. У рэдкіх выпадках вірус гепатыту А можа справакаваць пашкоджанне тканкі печані, тады спатрэбіцца тэрміновая медыцынская дапамога.

Ці трэба звярнуцца да педыятра пры падазрэнні на гепатыт А?

Так, трэба звярнуцца да ўрача ў наступных выпадках:

• скура і вочы дзіцяці сталі жоўтага колеру;
• мача стала цёмна-карычневай;
• дзіця скардзіцца на боль у жываце на працягу некалькіх дзён;
• у яго з’явіўся невытлумачальны сып.

Калі ў дзіцяці назіраюцца любыя з вышэйпералічаных сімптомаў ці існуе падазрэнне на магчымае заражэнне, варта неадкладна звярнуцца да педыятра.

Дыягностыка гепатыту А

Калі педыятр палічыць, што сімптомы ў дзіцяці могуць быць выкліканы гепатытам А, для пацвярджэння дыягназу ён прызначыць аналіз крыві.

У некаторых выпадках можа спатрэбіцца ультрагукавое даследаванне печані.

Лячэнне гепатыту А

Спецыяльнага лячэння ў выпадку гепатыту А не існуе, яно накіравана на палягчэнне сімптомаў.

Пры дыярэі ці рвоце важна забяспечыць папаўненне вадкасці (лепш пітной вадой) для прадухілення абязводжвання.

Пры моцна выяўленых сімптомах, магчыма, спатрэбіцца шпіталізацыя. Такія выпадкі здараюцца даволі рэдка.

Не трэба даваць дзіцяці парацэтамол без папярэдняй кансультацыі з педыятрам. Пры парушэнні работы печані ў выніку інфіцыравання гепатытам А нават звычайная доза парацэтамолу можа пагоршыць стан.

Прафілактыка гепатыту А

У любой частцы свету, але асабліва ў месцах без якасных сістэм каналізацыі, прафілактыкай гепатыту А з’яўляецца выкананне правіл гігіены. Перш за ўсё гэта мыццё рук з мылам пасля кожнага наведвання прыбіральні і перад ежай.

Калі вы плануеце паездку ў месца, дзе рызыка заражэння гепатытам А высокая, рэкамендуецца зрабіць прышчэпку ад гепатыту А дзецям, старэйшым за 12 месяцаў.