Гульня мае важнае значэнне для агульнага развіцця, навучання, здароўя нованароджанага і ўмацавання сувязі з ім. Гульня з немаўлём — гэта ўзаемадзеянне з ім: калі вы ўсміхаецеся дзіцяці, гуляеце з ім у «дражнілкі», даяце яму паляжаць на жываце і г. д.

Гульні з нованароджанымі: чаму гэта важна

Гуляць з дзіцем важна для яго агульнага развіцця, навучання і здароўя.

У працэсе гульні ваш нованароджаны даведваецца пра навакольны свет і пра тое, як ён можа з ім узаемадзейнічаць. Новы досвед, які дзіця атрымлівае падчас гульняў, таксама спрыяе таму, што мозг вашага немаўляці пачынае наладжваць узаемасувязі і развівацца. А гульні, якія прымушаюць дзіця рухацца, спрыяюць развіццю агульнай і дробнай маторыкі і сілы мышцаў.

Гульня з нованароджаным дапамагае яму вучыцца гаварыць і разумець словы. Магчыма, у вас не заўсёды будзе час, каб адкласці ўсе справы і пагуляць, але вы ўсё роўна можаце паразмаўляць са сваім дзіцем пра тое, што адбываецца, напрыклад, калі вы гатуеце вячэру, робіце пакупкі ці складваеце адзенне.

Сумесная гульня дапамагае вам і вашаму дзіцяці больш даведацца адзін пра аднаго. Яна можа многа расказаць вам пра вашага нованароджанага. Прымітыўныя і дураслівыя або ціхія і спакойныя — вы хутка зразумееце, якія гульні падабаюцца вашаму дзіцяці.

Калі вы гуляеце, дзіця вучыцца давяраць вам і спадзявацца на вас, а сувязь паміж вамі становіцца больш трывалай. Гэта дапаможа яму адчуць сябе любімым і абароненым.

Ідэі для гульняў з нованароджанымі

Важней за ўсё ў гульнях з вашым нованароджаным — зносіны з ім, а не цацкі і іншыя атрыбуты. Каб пачаць гуляць з нованароджаным, патрэбны толькі вы самі і ваша дзіця.

Вось некалькі ідэй для гульняў з нованароджанымі:

Спявайце, размаўляйце, лёгенька казычыце дзіця, лічыце пальчыкі на ножках, гуляйце ў «дражнілкі» — выбірайце простыя гульні. Немаўляты таксама любяць забавы з дотыкамі, напрыклад «Ідзе каза рагатая». Таксама выдатна, калі вы будзеце расказваць дзіцячыя вершыкі ці спяваць традыцыйныя для вашай культуры песенькі на роднай мове.
Крыўляйцеся, усміхайцеся, паказвайце язык... Ваш нованароджаны любіць глядзець на ваш твар. Змена падгузнікаў — гэта выдатны час для гульняў твар у твар.
Давайце свайму дзіцяці розныя прадметы, якія яно зможа памацаць, — мяккія цацкі, бразготкі або развіваючыя кніжкі з тканіны са старонкамі рознай тэкстуры прынясуць многа радасці вашаму нованароджанаму. Калі дзіця мацае розныя рэчы, гэта дапамагае яму спазнаваць свет вакол сябе.
Паказвайце свайму нованароджанаму дзіцяці свет — глядзіце з ім у акно, разглядайце дамы, людзей і ўсё навокал.
Давайце дзіцяці кожны дзень ляжаць на жываце. Так яно вучыцца трымаць сваю галоўку і глядзець на рэчы пад іншым вуглом. Заўсёды сачыце за сваім дзіцем, пакуль яно ляжыць на жываце, а спаць укладвайце на спіну.
Размаўляйце з нованароджаным або ўтварайце гукі і давайце яму адказаць. Магчыма, гэта зойме некаторы час, але вы здзівіцеся, колькі ўсяго можа «сказаць» ваша дзіця. Так яно навучыцца разумець, што ў дыялогу слухаць і гаварыць трэба па чарзе.
Паспрабуйце чытаць свайму дзіцяці. Пачынаць чытаць ніколі не рана, але памятайце пра тое, што трымаць кнігу трэба блізка, бо нованароджаныя могуць бачыць толькі на адлегласці прыкладна 20–30 см перад сабой.

І не забывайце атрымліваць задавальненне. Гульня — гэта весялосць для ўсіх.

Дзіця само падкажа вам, як сябе паводзіць. Нават энергічным дзецям патрэбен адпачынак, і яны могуць стаміцца, калі вы будзеце гуляць з імі вельмі доўга. Заўважыўшы, што дзіця выглядае спалоханым або засмучаным, паспрабуйце зрабіць паўзу і пагуляць з ім у больш спакойную гульню.