Ужыванне нікаціну падчас груднога выкормлівання

Калі вы курыце ​​тытунь ці электронныя цыгарэты падчас груднога выкормлівання, нікацін і спадарожныя шкодныя рэчывы трапляюць у арганізм дзіцяці праз малако, таксама немаўля падвяргаецца пасіўнаму курэнню. Тытунёвы дым утрымлівае больш за 4000 хімічных рэчываў (уключаючы цыянід, свінец), 60 з якіх з’яўляюцца канцэрагеннымі. У маці, якія кураць (асабліва ў «заўзятых», якія выпальваюць больш за 20 цыгарэт на дзень), можа быць дэфіцыт бэта-караціну, вітамінаў B6, B12 і C. Дзіця можа хвалявацца, капрызіць, у яго назіраецца парушэнне сну. Нікацін можа знізіць выпрацоўку малака; у маці, якія кураць, павышана рызыка ўзнікнення мастыту.

Раптоўная дзіцячая смерць часцей сустракаецца ў сем’ях курцоў, у такіх дзяцей вышэйшая верагоднасць развіцця сярэдняга атыту, астмы, а ў пазнейшым узросце — і сардэчна-сасудзістых захворванняў.

Было б ідэальна адмовіцца ад курэння, пакуль вы плануеце цяжарнасць ці прынамсі на ранніх яе тэрмінах. Кінуўшы курыць, вы здзейсніце адну з самых вялікіх змен, якая сапраўды акажа станоўчы ўплыў на ваша здароўе і здароўе вашага дзіцяці. Калі вы не ў сілах зрабіць гэта самастойна, звярніцеся па прафесійную параду і дапамогу. Гэта лягчэй рэалізаваць падчас цяжарнасці, калі ў вас больш часу, чым пасля родаў.

Калі вам не ўдалося пазбавіцца ад шкоднай звычкі, паспрабуйце хаця б скараціць колькасць цыгарэт, якія выпальваеце. Таксама рэкамендуецца вытрымліваць хаця б 60-хвілінны перапынак паміж выкурваннем цыгарэты і прыкладаннем немаўляці да грудзей, паколькі колькасць нікаціну ў малаку з часам памяншаецца.

Вы таксама можаце абараніць сваё дзіця, калі будзеце курыць толькі на вуліцы. Тытунёвы дым застаецца на валасах, адзенні і скуры. Падчас курэння накрывайце валасы і адзенне чым-небудзь, да чаго дзіця не будзе дакранацца. Заўсёды мыйце рукі і чысціце зубы пасля курэння, перш чым узяць дзіця. Сачыце, каб тыя, хто курыць, знаходзіліся дастаткова далёка ад вас і вашага дзіцяці.