Социалдык-эмоционалдык өнүгүүнү стимулдаштыруу: 18-24 ай

"Наристеңиз өзүн жана өзүнүн муктаждыктарын барган сайын жакшыраак түшүнө баштайт. Сизден бөлүнгөнүнө болгонтынчсыздануу сезими басаңдайт. Бала сиз менен бирге ар кандай оюндардан ырахат алат. Ал көп учурда каршы пикирин билдирип же өзүнүн эркин таңуулай алат. Каалоолорунун аткарылбаганына жана чектөөлөргө карата реакциялары мурункуга караганда күч алышы мүмкүн. Балага каалоолорун жылдырып, чектөөлөрдү кабыл алууну түшүнүүгө убакыт жана чыдамдуулук талап кылынат. "

Коомдук сезимдер

• Башкалар менен болгон иш-аракеттерде пайда болгон окуялар ар кандай сезимдерди жаратат. Алар кээде күчтүү болуп көзөмөлдөө кыйынга турат.

• Кубанычтан же ачуудан тышкары, ийгиликсиздиктен, уялуудан же көрө албастыктан улам ыңгайсыздыктын пайда болушу баланын башын айландырышы мүмкүн. Наристенин сезимдери сиздин кубаттоо же сындоо реакцияларыңыздан улам калыптанат.

• Наристеңизге анын сезимдерин түшүнүүгө жардам бериңиз. Ошондо гана ал өзүн жакшы сезип, күчтүү сезимдерди башкара алат. Ошентип бала башкалардын сезимдерин оңоюраак түшүнүп, сыйлай алат.

• Сындаганда этият болуңуз, балаңыздын эмнени сезип жаткандыгын айтыңыз, кыскача түшүндүрмө бериңиз, аны өткөн окуяга байланыштырыңыз.

Нааразычылык жана кызматташтыктын жоктугу

• Наристеңиз  сиздин талаптарыңыз менен көбүнчө макул болбошун күтүүгө  болот. Ошентип ал өзүнүн көзкарандысыздыгын, ниетин ишке ашырууда туруктуулугун, ошондой эле чектөөлөрдү жана кээ бир эрежелерди кабыл алуудагы кыйынчылыктарын көрсөтөт.

• Бул реакциялардын айрымдары чыр салуу түрүндөгү катуу нааразычылыктар менен мүнөздөлүшү мүмкүн. Сабырдуу болуңуз. Катаал жана ачууланып реакция кылбаңыз. Сиздин жүрүм-турумуңуз балага мындай учурларга жеңилирээк туруштук берүүгө жардам берет.

• Талаптарыңыздын жана реакцияларыңыздын так жана ырааттуу болушуна ынаныңыз. Өзүңүздүн иш-аракеттериңиз боюнча түшүндүрмө бериңиз. Кызматташуунун артыкчылыктарын белгилеңиз.

• Кээде эрежелерди кайра карап чыгууга туура келет. Ашыкча талап наристенин каршылыгын жаратып, жүрүм-турум көйгөйлөрүн күчөтүшү мүмкүн.