„Nervozne“ navike kod djece

Navike poput grickanja noktiju, sisanja palca ili čačkanja nosa veoma su česte kod djece. Takve ponavljajuće radnje, iako ne djeluju baš lijepo, mogu da pomognu u oslobađanju od stresa i obično nestaju spontano. Najbolji način da pomognete svom djetetu da prekine s nekom lošom navikom jeste da ga blago opominjete kad god to čini i da ga pohvalite kad to ne čini.

Šta su tzv. nervozne navike kod djece i zašto se javljaju?

Navika je neko ponašanje koje dijete ponavlja iznova i iznova, gotovo bez razmišljanja. Tipične dječje navike, koje se često nazivaju „nervoznim“, uključuju dodirivanje i čačkanje djelova lica ili tijela. One nam možda smetaju ili nas frustriraju, ali obično nema razloga za brigu. Djeca su ponekad svjesna svojih navika, a ponekad nisu.

Najčešće dječje navike su:

  • sisanje prsta (obično palca);
  • grickanje noktiju;
  • vrćenje i čupkanje kose;
  • čačkanje nosa ili rane;
  • grickanje usana ili unutrašnje strane obraza;
  • žvakanje predmeta kao što su olovke, djelovi odjeće.

Zašto se javljaju ove navike? One mogu biti neka vrsta utjehe za djecu. Na primjer, kad dijete napušta fazu bebe, sisanje palca često se javlja kao način umirivanja anksioznosti. A ponekad navike počinju prosto jer je djetetu dosadno. Ipak, treba obratiti pažnju, jer neka ponašanja možda izgledaju kao navike, a zapravo imaju medicinski uzrok. Na primjer, ako Vaše dijete vuče ili udara uvo i uz to je nervozno, to može biti znak da ima infekciju uha ili da mu izbijaju zubi.

Lagano razbijanje navika

Većina dječjih navika nestaje sama od sebe. Ali ako ta navika ometa svakodnevne aktivnosti djeteta, postaje neugodna ili čak nanosi štetu, možda je bolje da preduzmete nešto. Na primjer, uobičajeno je da dijete ponekad sisa palac ili druge prste. No ako Vaše dijete neprestano sisa prste, ako ga to ometa u razgovoru, jelu ili ga zbog toga zadirkuju vršnjaci, pokušajte da nježno prekinete tu naviku. Evo nekoliko savjeta:

  • Pohvale mogu mnogo da pomognu i doprinesu prekidanju navike. Na primjer, možete reći: „To je sjajno! Vidiš kako jasno čujem tvoje riječi kad ti prsti nisu u ustima.“
  • Podsјetite dijete na naviku. Na primjer, ako vidite da ponovo sisa ili žvaće rukav, možete reći: „Molim te, nemoj da žvaćeš rukav – to nije lijepo.“ Ali nemojte od toga praviti bauk.
  • Pokušajte da nađete nešto čime bi Vaše dijete moglo „zaposliti“ ruke u vrijeme kad nije fizički aktivno. Na primjer, dok gleda televiziju, možete ga podstaći da se igra igračkom koja ima pokretne djelove i sl.

Kad treba potražiti pomoć?

U uzrastu od tri godine, sisanje palca ili prstiju već može postati problem za razvoj djetetovih zuba. Ako Vaše trogodišnje dijete i dalje sisa prste, porazgovarajte o tome s ljekarom.

Navika ili tik?

Tikovi nisu navika. To su grčevi mišića praćeni nevoljnim trzajima, iznenadnim pokretima lica i tijela koje dijete ne kontroliše. Najčešći tikovi kod djece uključuju naglašeno treptanje, trzaje glavom, grčenje lica, trzanje rukom ili ramenom. Dijete nekad može voljno da zaustavi tik, ali samo nakratko – čim prestane da misli o tome, tik će se vratiti.

Ako Vas tikovi Vašeg djeteta brinu ili osjećate da je dijete zbog toga uznemireno, najbolje je da potražite pomoć zdravstvenog radnika.