Говорот на телото на вашето предвремено родено бебе
За говорот на телото на предвремено родено бебе
Предвремено родените бебиња имаат различен говор на телото од бебињата кои се родени на време. Тоа е затоа што предвремено родените бебиња се помалку зрели, помали, почувствителни на допир и бучава, и не се толку силни.
На пример, чувствата на предвремено родено бебе може да се покажат како позачестено дишење, посветла боја на кожата и грчеви на телото. Овие работи честопати можат брзо да се променат, но тие ви даваат индиции за тоа како се чувствуваат тие бебиња.
Исто така, говорот на телото на предвремено родено бебе во 24 -та недела ќе биде различен од говорот на бебе родено во 34 -та недела. На пример, многу порано предвремено родени бебиња можеби нема да остваруваат контакт со очите толку долго или толку често колку бебињата кои се родени блиску до рокот.
Говорот на телото и одговорите на вашето предвремено родено бебе ќе се менуваат како што тоа станува поголемо и посилно и ќе добивате поочигледни индиции за тоа како се чувствува вашето бебе. На пример, предвремено родените бебиња не плачат толку силно како бебињата кои се родени на време, но ќе забележите дека вашето бебе плаче повеќе како што расте. Веројатно ќе почне и да сака да остварува контакт со очи.
Како што вашето бебе ќе расте, ќе видите и поодредени „состојби“. На пример, многу рано предвремено родено бебе може да ги отвори очите само повремено. Но, предвремено родено бебе блиску до рокот постепено ќе има се повеќе и подолги периоди кога е будно и активно. Може да биде длабоко заспано, лесно заспано, поспано, будно и активно, или да плаче.
Секогаш очекувајте го неочекуваното - предвремено родено дете нема да реагира на ист начин од еден до друг ден. Можеби ќе ви помогне да знаете дека секој ден ќе го запознавате вашето бебе повеќе и ќе бидете подобри во читањето на знаците кои тоа ви ги дава.
Најдобро време за да комуницирате со вашето предвремено родено бебе е кога е будно и активно. Ова е време кога најверојатно вашето бебе ќе биде мирно и опуштено. Полесно е да се поврзете со вашето бебе кога е будно, активно и опуштено.
Говорот на телото што го покажува вашето предвремено родено бебе кога се чувствува непријатно
Кога предвремено родените бебиња се чувствуваат непријатно, преоптоварени или под стрес, тие можат да го покажат тоа со говорот на телото.
Вашето предвремено родено бебе може:
- да се разбуди или остане будно и е вознемирено
- се менува од будно во поспано или возбудено или почнува да плаче откако ќе стане поголемо и посилно
- има вознемирен изглед на лицето или има збрчкано чело - понекогаш наречено „подигање на веѓа“
- прави нервозни движења на рацете и нозете, го покрива лицето со рацете, или ги стиска во тупаница прстите и шаките
- дише побрзо или има забрзан пулс
- бојата на кожата се менува во бледа, црвена, шарена или помодрува
- се прозева, кива, ика или плука.
Ако ги видите овие знаци додека сте покрај бебето, покријте го, смирете го и не правете ништо за момент. Ова треба да му помогне да се врати во рамнотежа.
Ако вашето бебе е во инкубатор, кажете и на медицинската сестра и видете дали можете да работите заедно за да ја промените околината на вашето бебе, за да му биде поудобно. На пример, можеби ќе треба да се прилагоди бучавата или светлината или положбата на бебето.
Нашата статија како да му помогнете на вашето предвремено родено бебе да се чувствува смирено има повеќе совети за ублажување на непријатноста на вашето бебе.
Знаци дека вашето предвремено родено бебе е опуштено
Понекогаш можете да заклучите дека вашето предвремено родено бебе е опуштено и му е удобно само од фактот дека не покажува знаци на непријатност.
Ако вашето предвремено родено бебе се чувствува добро, вие исто така може да видите дека тоа:
- има редовно, опуштено дишење
- има опуштено тело
- се врти со помалку згрченост и на понежен начин
- е мирно и будно и можеби дури и ќе сака да ве погледне или да направи нешто друго.
Бебето може да биде многу заинтересирано да гледа во нешто (најчесто лице), а неговото тело ќе биде мирно и дишењето бавно. Ова е начин на кој вашето предвремено родено бебе покажува дека е заинтересирано.
Како што вашето предвремено родено бебе расте, ќе може да остане будно и да биде активно во кратки периоди. Ова е време да си играте со него, со зборување, гушкање, пеење или контакт со очите. Добра идеја е да се балансира овој вид активна игра со тивки активности како нежно држење и бавни движења.
