Однесување на бебе и мало дете кое може да ве загрижи: срамежливост

Прилично е вообичаено бебињата и малите деца да бидат срамежливи. Бебињата може да се „прилепуваат“ за своите родители, да плачат во различни социјални ситуации, да се кријат или да ги свртат главите од луѓето за намерно да избегнат контакт или да ги затворат очите.

Малите деца може да се кријат зад своите родители, да избегнуваат играње со врсници или возрасни или да одбијат да разговараат кога ќе им зборуваат луѓе кои не им се познати.

Детето најлесно ќе се „загрее“ доколку помине некое време со новата личност, или се запознава со ситуацијата во која се наоѓа. Понекогаш, срамежливоста нема целосно да исчезне, но детето ќе се чувствува сè поудобно и самоуверено кога комуницира со другите.

Што можете да направите?

дајте му време на вашето бебе или мало дете да се почувствува удобно. Не инсистирајте на контакт (било физички - да го кренат, да го бакнат, гушкаат, да се ракуваат или вербално - да одговара на прашања);
дајте му на детето до знаење дека неговите чувства се во ред, да ги именувате и јасно кажете му дека заедно ќе најдете начин како детето да се чувствува поудобно (на пример, можете да кажете: „гледам дека малку се плашиш затоа што не ги знаеш овие деца Ајде прво да одиме заедно да видиме што има таму“);
бидете со бебето или малото дете во нови ситуации или ситуации кои бараат интеракција (како што се игралишта, игротеки). За тоа време, поддржете го детето во истражување на просторот, играчките. Секогаш фалете ги „храбрите“ однесувања - кога детето реагира, гледа во личност, пробува нешто ново, воспоставува контакт или игра подалеку од вас или со некого;
бидете мирни и воздржани - не го отфрлајте детето, но не тешете го премногу. Обидете се да ја прикажете ситуацијата како нормална, а во исто време да покажете дека разбирате дека детето се чувствува непријатно и дека сте тука да најдете начин да го натерате да се чувствува подобро заедно. Дајте му пример на детето, за да може да научи набљудувајќи ги вашите реакции, прилагодувања и однесување (на пример, кога некој ќе ви се обрати - одговорете);
„Бидете на страната на детето“. Ако некој го нарече срамежлив во негово присуство, слободно исправете го пред детето: „нему му треба малку време да се загрее и да ги запознае сите. Штом ќе се почувствува удобно, ќе се приклучи на играта“. Ова му испраќа порака на детето дека разбирате како се чувствува, го прифаќате и сте сигурни дека вешто ќе се справи со оваа ситуација.

Кога срамежливоста е проблем? Понекогаш срамежливоста може да прерасне во анксиозност и прекумерна грижа. Ако детето има изразена срамежливост што го попречува неговото и вашето функционирање (не може да оди на одредени места, избегнува ситуации кои бараат контакт, покажува страв или непријатност на игралишта, во игротеки итн.) и нема промена, побарајте стручен совет.