Meva va sabzavotlarni yuvish: 3-6 yoshli bolalar uchun mashg'ulotlar

Meva va sabzavotlarni yuvish bolangizga soʻzlarni, hisoblash, fikrlash koʻnikmalarini va boshqalarni oʻrganishning qiziqarli usuli boʻlishi mumkin. Buning uchun sizga turli xil yangi meva va sabzavotlar, idish va suv kerak boʻladi. Suhbatlashish, savollar berish va yangi tusunchalarni kiritish orqali bolaga ushbu mashgʻulotni bilib olishga yordam bering.

Meva va sabzavotlarni yuvish: nima uchun bu bolalar uchun qiziqarli mashgʻulot hisoblanadi?

Sabzavot va mevalarni yuvish qiziqarli boʻlishi mumkin:

  • bolani “qalampir”, “qovoq” va “olxoʻri” kabi yangi soʻzlar bilan tanishtirish uchun;
  • bolani shakl, oʻlcham, vazn kabi hisoblash tushunchalari bilan tanishtirish uchun;
  • fikrlash qobiliyatlarini rivojlantirish uchun;
  • bolani kundalik muhitini oʻrganishga qiziqtirish uchun;
  • bolangizga kundalik gigiyena va sogʻlom ovqatlanish haqida bilib olishga yordam berish uchun.

Meva va sabzavotlarni yuvish uchun nima kerak?

Bu topshiriq uchun meva va sabzavotlarni bozor yoki supermarketdan uyga olib kelganingizdan soʻng, bolani ularni yuvishga jalb qiling.

Meva va sabzavotlar qanchalik xilma-xil boʻlsa, shuncha yaxshi.

Farzandingiz sizga yordam berishi uchun idish, toza suv bilan birga qoʻshimcha vaqt kerak boʻladi.

Meva va sabzavotlarni yuvishni qanday qilib oʻquv mashgʻulotiga aylantirish mumkin?

Buni quyidagicha boshlash kerak:

  • Meva va sabzavotlarni yuvish uchun idishni toza, sovuq suv bilan toʻldiring.
  • Farzandingiz meva va sabzavotlarni koʻrayotganiga va ularga qoʻli yetishiga ishonch hosil qiling. Agar zarur boʻlsa, bola ustida turishi mumkin boʻlgan kursi qoʻying.
  • Bolangizga meva yoki sabzavotni suvga botirib, qoʻllar bilan ishqalab yuvishni koʻrsating.
  • Meva yoki sabzavotni suvdan oling va quriting.

Farzandingiz nima qilayotganini tushungach, unga meva yoki sabzavotni tekshirishga ruxsat berishingiz mumkin. Farzandingiz bajarayotgan ishlarni kuzatib boring va suhbatlashish hamda savollar berish orqali uni soʻzlar va tushunchalar bilan tanishtiring. Masalan:

  • Ranglar haqida gapiring. Farzandingizdan meva va sabzavotlarning ranglarini aytishni soʻrang.
  • Shakli, hajmi va tuzilishi haqida gapiring. Siz meva va sabzavotlarni solishtirishingiz mumkin – masalan, “Qaysi pomidor kattaroq?” yoki “Ushbu sabzi bu bodringdan uzunroq” deyish mumkin.
  • Meva va sabzavotlarning suvda choʻkishi yoki suv yuzasida qolishiga uning eʼtiborini qarating. Meva va sabzavotlarni suvga solishdan oldin farzandingizdan ularning qaysi biri suzishi yoki choʻkishi mumkinligini soʻrang.

Ushbu mahsulot oʻsimlikning qaysi qismiga tegishli ekanligini muhokama qiling. Ismaloq – barg, turp va sabzi – ildiz, pomidor esa meva (hatto taʼmi shirin boʻlmasa ham!).

Turli yoshdagi bolalarni ushbu oʻquv faoliyatiga moslashtirish

Farzandingizning qiziqishi va eʼtiborini hisobga oling. Agar u togʻorachada shunchaki suvni chayqaltirib oʻynashni yoqtirsa, bir nechta qattiq mahsulotlarni (sabzi yoki olma kabi) yuvish uchun bering, keyin oʻzingiz hammasini tozalab yuving.

Meva va sabzavotlarni yuvayotganda katta farzandingizga murakkab savollar berishingiz mumkin – masalan, “Barglar oʻsimliklarga nima uchun kerak deb oʻylaysan?” Bundan tashqari, sevimli meva va sabzavotlaringiz yoki siz tayyorlamoqchi boʻlgan taomga ishlatiladigan mahsulotlar haqida suhbatlashsangiz ham boʻladi.