Пасля заўчасных родаў: вашы адчуванні

Пасля нараджэння неданошанага дзіцяці звычайна ўзнікаюць як станоўчыя, так і адмоўныя пачуцці. Каб справіцца з негатыўнымі эмоцыямі, іх трэба прыняць і прагаварыць. Чаргаванне поспехаў і няўдач — гэта нармальна, але паспрабуйце засяродзіцца на поспехах і дасягненнях дзіцяці. Калі вы надаяце ўвагу свайму фізічнаму і псіхічнаму здароўю, вы можаце лепш клапаціцца і пра немаўля.

Вашы адчуванні пасля заўчасных родаў: чаго чакаць

Заўчасныя роды могуць пахіснуць ваш давер да свету. Перажываць цэлую гаму змешаных, а часам і супярэчлівых пачуццяў — нармальна.

Вядома, у вас ёсць станоўчыя эмоцыі, напрыклад радасць, любоў да дзіцяці.

Але часта жанчыны задаюцца пытаннем, чаму так адбылося і што стала прычынай заўчасных родаў. Гэты досвед можа выклікаць у вас пачуццё бездапаможнасці, суму, віны, трывогі і траўміраваць вас. Наведваючы немаўля ў аддзяленні інтэнсіўнай тэрапіі ці паталогіі нованароджаных, вы можаце адчуваць трывогу, страх і разгубленасць.

У некаторых бацькоў можа ўзнікнуць злосць у адносінах да ўрача, сябе ці да нованароджанага за тое, што ён прымусіў іх адчуваць сябе настолькі дрэнна ці што нарадзіўся раней за належны тэрмін. У гэтым выпадку бацькам можа быць псіхалагічна складана наведваць дзіця ў аддзяленні інтэнсіўнай тэрапіі. Гэта таксама нармальна.

Заўчаснае нараджэнне дзіцяці — сур’ёзнае выпрабаванне як для самога немаўляці, так і для яго сям’і. Многія бацькі знаходзяцца ў стане шоку і не адчуваюць рэальнасці таго, што адбываецца. У такой сітуацыі вельмі лёгка адчуць бяссілле ці страту кантролю над сітуацыяй. Пакуль нованароджаны знаходзіцца ў аддзяленні інтэнсіўнай тэрапіі, некаторым бацькам складана ўсвядоміць, што гэта іх дзіця.

Для многіх мам дзень выпіскі з бальніцы асабліва цяжкі, таму што, з’яжджаючы дадому, яны вастрэй перажываюць расставанне з дзіцем.

З часам праблем, як правіла, становіцца менш і спраўляцца з імі лягчэй. Па меры таго, як дзіця дужэе, а яго стан становіцца больш стабільным, вам могуць дазволіць браць немаўля на рукі. Удакладніце, ці ёсць у вашым радзільным доме магчымасць прымянення метаду «кенгуру» — гэта спосаб выходжвання з выкарыстаннем кантакту «скура да скуры». Медперсанал, які даглядае ваша дзіця, акажа вам дапамогу.

Дзякуючы ўсяму гэтаму вы адчуеце сябе больш упэўнена, у вас знізіцца трывога і будзе лепш наладжвацца сувязь з немаўлём.

Як справіцца з перажываннямі з нагоды заўчасных родаў: парады

Вось некалькі ідэй, якія дапамогуць вам справіцца з адмоўнымі эмоцыямі і адчуць сябе лепш.

Праца з пачуццямі

Прыміце свае пачуцці, якімі б яны ні былі, — не адмаўляйце іх. Прызнаваць свае эмоцыі — карысная практыка.
Пагаварыце з кім-небудзь пра свае пачуцці. Гэта можа быць муж/партнёр, член сям’і, сябар, якому вы давяраеце, або спецыяліст.
Прыміце спосаб, з дапамогай якога ваш муж/партнёр спраўляецца са стрэсам, калі ён адрозніваецца ад вашага. Дазвольце яму дзейнічаць так, як ён лічыць патрэбным, расказвайце адзін аднаму пра пачуцці і слухайце адзін аднаго.

Клопат пра сябе

Ешце здаровую ежу, будзьце фізічна актыўнай, адпачывайце як мага больш і ўдзяляйце час рэчам, якія вам падабаюцца. Нядрэнна будзе абмежаваць ужыванне кафеіну, алкаголю і іншых стымулюючых рэчываў.
Акружыце сябе людзьмі, якія дапамагаюць вам адчуваць сябе пазітыўна.
Па магчымасці пазбягайце непатрэбнага стрэсу. Час ад часу выкарыстоўвайце перадышкі, каб рабіць нешта для сябе.
Кожны дзень знаходзьце час для адпачынку, хаця б некалькі хвілін. Можна зрабіць дыхальныя практыкаванні, паслухаць любімую музыку ці прагуляцца па сваім квартале. Вы таксама можаце рабіць дыхальныя практыкаванні, слухаць музыку і расслабляцца, калі знаходзіцеся побач з дзіцем.

Узаемадзеянне з дзіцем

Адзначайце поспехі і дасягненні — вашыя і дзіцяці. Нягледзячы на тое, што ваша немаўля можа знаходзіцца на розных этапах выходжвання неданошаных дзяцей — у аддзяленні інтэнсіўнай тэрапіі, затым у аддзяленні нованароджаных, — яно ўсё роўна будзе дасягаць важных для яго мэт і праходзіць пэўныя этапы развіцця. А ў вас будзе многа нагод для добрага настрою.
Кантактаванне з дзіцем дапаможа палепшыць ваша самаадчуванне. Удзельнічайце ў штодзённым доглядзе немаўляці.
Высветліце, чым вы можаце дапамагчы свайму дзіцяці. Напрыклад, разабрацца ў нейкай тэхналогіі, навучыцца распазнаваць прыкметы стрэсу ў немаўляці і акуратна мяняць яму падгузнікі. Асвойвайце навыкі не адразу, а па адным.
Памятайце, што ёсць рэчы, якія можаце рабіць як маці толькі вы. Вашы дотыкі, пах і голас маюць вельмі важнае значэнне для дзіцяці. Вы для яго — самы галоўны абаронца.

У першыя дні і тыдні жыцця дзіцяці вельмі важна паклапаціцца і пра сябе. Дбаючы пра сябе, вы будзеце ў лепшым стане, каб клапаціцца пра немаўля.

Ідэі ад бацькоў неданошаных дзяцей: спіс «эмацыянальных жаданняў»

Некаторыя бацькі, чые дзеці нарадзіліся неданошанымі, лічаць карысным складаць спісы «эмацыянальных жаданняў» і дзяліцца імі з сябрамі і сям’ёй. Вось некаторыя думкі з аднаго такога спіса:

Маё дзіця жывое і важнае для мяне. І якім бы яно ні было хворым, мне трэба адсвяткаваць яго нараджэнне з вамі.
Я ўдзячная вам за тое, што магу пры вас плакаць, таму што так мае эмоцыі знаходзяць выйсце, а не назапашваюцца, ператвараючыся ў трывогу.
Нараджэнне дзіцяці раней за тэрмін — не тое ж самае, што звычайная цяжарнасць або роды, таму не трэба параўноўваць мой вопыт з вашым ці нечым яшчэ.
Заўчасныя роды не заразныя, таму не трэба мяне пазбягаць.
Калі ласка, не чакайце, што мае цяжкасці скончацца праз шэсць тыдняў, месяцаў ці нават гадоў. Я спрабую ўжыцца з мноствам супярэчлівых эмоцый, так што ўсяму свой час.
Калі ласка, не супакойвайце мяне пустымі словамі накшталт: «Горшае ўжо мінула». У майго дзіцяці могуць быць праблемы ў будучыні, і мая задача — дапамагаць яму развівацца і не прапусціць іх.
Спадзяюся, вы разумееце, што з нараджэннем неданошанага дзіцяці я змянілася. І я не ведаю, ці стану ранейшай, і калі менавіта гэта адбудзецца.

Розныя сем’і па-рознаму перажываюць нараджэнне неданошанага дзіцяці. Даведацца пра вопыт іншых можа быць карысным, але памятайце, што не існуе адзінага правільнага спосабу пражыць свае пачуцці і эмоцыі.

Не проста сум: пасляродавая дэпрэсія пасля заўчасных родаў

Пасля нараджэння дзіцяці ў маці часта ўзнікаюць перапады настрою, якія вар’іруюцца ад лёгкіх да значных.

Многія жанчыны ў першыя дні пасля родаў адчуваюць лёгкую дэпрэсію. Калі такі стан працягнецца і пагоршыцца, можа ўзнікнуць пасляродавая дэпрэсія. Яе таксама могуць перажываць і мужчыны.

Прыкметы пасляродавай дэпрэсіі: пастаянны смутак, дрэнны настрой, пачуццё безнадзейнасці, недахоп энергіі, нізкая самаацэнка і праблемы са сном.

Калі вы лічыце, што ў вас пасляродавая дэпрэсія, вам патрэбна эмацыянальная падтрымка з боку сям’і і сяброў. Многія бацькі лічаць карыснай псіхалагічную або псіхатэрапеўтычную дапамогу, таксама можа спатрэбіцца медыкаментознае суправаджэнне. Рэкамендуецца наведаць псіхіятра ці псіхатэрапеўта, які прызначыць вам аптымальнае лячэнне. Даведайцеся больш пра пасляродавую дэпрэсію ў жанчын і мужчын.