Сон малога дзіцяці: чаго чакаць

Малым дзецям неабходна каля 12–13 гадзін сну ў суткі. Звычайна гэта 10–12 гадзін сну ноччу і 1–2 гадзіны днём. Да распаўсюджаных праблем са сном у малых дзяцей адносяцца цяжкасці з засынаннем і нежаданне заставацца ў ложку, калі неабходна класціся спаць. Заведзены парадак падрыхтоўкі да сну дапаможа дзіцяці настроіцца на яго.

Сон малога дзіцяці: што трэба ведаць

У большасці выпадкаў малыя дзеці спяць практычна ўсю ноч і не будзяць ні маму, ні тату. Але ім падабаецца праяўляць самастойнасць, таму ўкласці іх спаць адразу можа быць няпростай задачай.

А яшчэ малыя дзеці лёгка ператамляюцца. Калі такое адбываецца, ім цяжэй заснуць. Як толькі вы заўважыце ў вашага дзіцяці прыкметы стомленасці, варта пачаць укладваць яго спаць да таго, як яно стане раздражнёным. Устаноўлены парадак падрыхтоўкі да сну аблегчыць вам задачу.

Калі дзіця засвоіць распарадак і рэжым сну, тады стане магчымым сфарміраваць у яго здаровыя звычкі і станоўчае стаўленне да сну.

Графік сну і няспання ў малых дзяцей дзяцей

Калі дзённы сон занадта працяглы і дзіця спіць да вечара, то пасля яно не захоча спаць аж да позняй ночы.

Для некаторых малых дзяцей нормай з’яўляецца абуджэнне ў 5:30 ці 6:00. І з гэтым нічога не зробіш. Укладванне дзіцяці спаць позна вечарам у надзеі, што яно будзе прачынацца раніцай пазней, можа не дапамагчы. Верагодна, дзіця ўсё роўна прачнецца рана, але будзе занадта раздражнёным з-за недасыпання.

Паспрабуйце класціся спаць прыкладна ў адзін час з дзіцем, каб адпачыць і набрацца сіл для новага дня. Акрамя таго, так вам будзе лягчэй прачнуцца, калі дзіця разбудзіць вас раніцай.

Парадак падрыхтоўкі малых дзяцей да сну

Сталы распарадак і рэжым дапамогуць падрыхтаваць дзіця да сну.

У большасці выпадкаў дзеці гатовы класціся спаць у прамежку з 18:30 да 19:30. Гэта зручны час, таму што мацней за ўсё яны спяць у перыяд з 20:00 да 24:00. Важна прытрымлівацца аднолькавага парадку як у выхадныя, так і ў буднія дні.

Парадак падрыхтоўкі да сну можа выглядаць прыблізна наступным чынам:

  • 18:30 — купанне, чыстка зубоў і змена падгузнікаў;
  • 18:45 — спакойны час (чытанне кніг, напрыклад казак);
  • 19:00 — укладванне ў ложак і пацалунак на ноч.

Перш чым выключаць святло, бегла агледзьце пакой дзіцяці, каб пераканацца, што ўсё ў парадку.

Адвучыце дзіця браць у ложак пустышку.

Не прывучайце дзіця браць у ложак бутэлечку з напіткам — гэта небяспечна, да таго ж можа прывесці да развіцця карыесу і яшчэ большых праблем са сном. Лепш, калі дзіця будзе дапіваць свой напітак за паўгадзіны да сну.

Што рабіць, калі дзіця заве вас і ўстае, пасля таго як яго паклалі спаць

Ваша дзіця можа праходзіць праз стадыю, калі яно кліча вас, устае ў ложачку і нават выбіраецца з яго пасля таго, як вы сказалі яму дабранач.

Паспрабуйце прытрымлівацца наступных рэкамендацый:

  • Пазбягайце шумных гульняў перад сном. З-за іх дзіцяці можа быць больш складана супакоіцца.
  • За гадзіну да таго, як класціся спаць, выключайце тэлевізар, камп’ютары і планшэты, а таксама не глядзіце перад сном страшныя ці захапляльныя мультфільмы, фільмы і перадачы.
  • Прыдумайце парадак падрыхтоўкі да сну, які дапаможа дзіцяці настроіцца на адпачынак, і старайцеся выконваць яго штодня.
  • Перад тым, як выйсці з пакоя дзіцяці, пераканайцеся, што ў яго ёсць усё, што трэба. Нагадайце дзіцяці, каб яно ціха ляжала ў ложку.

Калі дзіця жыве ў адным пакоі з братам ці сястрой, магчыма, давядзецца адкласці час адыходу да сну старэйшага дзіцяці на паўгадзіны, пакуль малодшае не супакоіцца і не засне. Калі вы будзеце настойлівымі і паслядоўнымі, яно хутка зразумее, што спаць значыць спаць.

Праверце, магчыма, вашаму дзіцяці сапраўды нешта трэба, калі яно заве вас. Брудны падгузнік варта змяняць, не ўключаючы яркае святло, старайцеся пры гэтым як мага менш трывожыць дзіця. Калі яно баіцца пачвары пад ложкам, трэба па-сапраўднаму і хутка праверыць (не ўключаючы святло) і сказаць, што ў пакоі пачвар няма. Калі дзіця баіцца цемры, уключайце ў яго пакоі начную лямпу.

Многім малым дзецям цяжка супакойвацца і ўкладвацца спаць. Але дзецям з расстройствамі аўтыстычнага спектра (РАС) засынаць і спаць можа быць яшчэ больш складана, і гэта сур’ёзная праблема. Вы можаце кантраляваць і пераадольваць многія праблемы са сном у дзяцей з РАС, калі будзеце прытрымлівацца аднолькавага распарадку кожны дзень.

Начныя кашмары

Начныя кашмары — стан, пры якім дзіця раптам палохаецца падчас моцнага сну. Начныя страхі ў дзіцяці могуць напалохаць і вас, пры гэтым само дзіця можа і не ўспомніць пра іх раніцай.

Недахоп сну здольны выклікаць у некаторых дзяцей начныя страхі. Калі вам здаецца, што ваша дзіця мала спіць, то і ў гэтым выпадку можа дапамагчы штодзённая спакойная падрыхтоўка да сну.

Начныя кашмары звычайна праходзяць праз 10–15 хвілін, але могуць працягвацца і даўжэй.

Калі дзіця пачынае спаць на «вялікім ложку»

Большасць дзяцей пачынаюць спаць на звычайным ложку ва ўзросце прыкладна ад 2 да 3,5 гадоў. Але варта памятаць пра асцярожнасць, паколькі некаторыя малыя дзеці могуць часцей злазіць з вялікага ложка.

Калі дзіця пачне вылазіць з дзіцячага ложачка ці яму трэба будзе ўставаць на гаршчок ноччу, можна пасля гэтага пакласці яго спаць на вялікім ложку.

Скрыгат зубамі

На пэўным этапе многія дзеці могуць скрыгатаць зубамі ў сне. Часцей за ўсё яны не прачынаюцца ад гэтых гукаў самі, але могуць разбудзіць іншых людзей у пакоі.

Праблемы са сном: дзе шукаць дапамогу

Снатворныя сродкі не з’яўляюцца рашэннем праблем са сном у дзяцей — існуюць лепшыя спосабы справіцца з такімі цяжкасцямі.

Пераадолець іх будзе нашмат прасцей пры падтрымцы кваліфікаванага спецыяліста. Праблемы са сном у дзяцей з’яўляюцца адной з самых частых прычын, па якой бацькі звяртаюцца па дапамогу да спецыялістаў.